لاہور کے مختلف علاقوں میں بارش سے موسم خوشگوار
لاہور: (دنیا نیوز) صوبائی دارالحکومت کے مختلف علاقوں میں بارش سے موسم خوشگوار ہو گیا۔
جیل روڈ، قرتبہ چوک، مال روڈ اور گردونواح میں بارش کا سلسلہ جاری رہا جبکہ کئی علاقوں میں ہلکی اور تیز بارش ریکارڈ کی گئی۔
محکمہ موسمیات کے مطابق لاہور کا موجودہ درجہ حرارت 33 ڈگری سینٹی گریڈ ریکارڈ کیا گیا ہے، جبکہ کم سے کم درجہ حرارت 27 اور زیادہ سے زیادہ 39 ڈگری سینٹی گریڈ تک جانے کا امکان ہے جب کہ آج اور کل وقفے وقفے سے بارش کی پیشگوئی بھی کی ہے۔
اعداد و شمار کے مطابق ہوا کی رفتار 6 کلومیٹر فی گھنٹہ ریکارڈ کی گئی جبکہ ہوا میں نمی کا تناسب 45 فیصد تک پہنچ گیا۔
شہر کے مختلف علاقوں میں ریکارڈ ہونے والی بارش کے مطابق نشتر ٹاؤن میں 11.2 ملی میٹر بارش ہوئی، جبکہ جوہر ٹاؤن میں 3.4، گلبرگ میں 0.8، سمن آباد میں 0.4، اقبال ٹاؤن میں 0.2 اور سگیاں میں 0.2 ملی میٹر بارش ریکارڈ کی گئی۔
محکمہ موسمیات کا مزید کہنا تھا کہ آئندہ 24 سے 48 گھنٹوں کے دوران بھی بارش کا سلسلہ وقفے وقفے سے جاری رہ سکتا ہے۔
