گل پلازہ سے متصل رمپا پلازہ کے ستون متاثر، غیر محفوظ قرار دیکر انتظامیہ کو نوٹس
کراچی: (دنیا نیوز) کراچی کے ایم اے جناح روڈ پر آتشزدگی کا شکار ہونے والے گل پلازہ سے متصل عمارت رمپا پلازہ کے ستون بھی متاثر ہوگئے۔
سندھ بلڈنگ کنٹرول اتھارٹی (ایس بی سی اے) نے گل پلازہ سے متصل عمارت رمپا پلازہ کو غیر محفوظ قرار دے دیا۔
حکام کا کہنا ہے کہ گل پلازہ میں تیسرے درجے کی آتشزدگی کے باعث رمپا پلازہ کے ستون بری طرح متاثر ہوئے ہیں، رمپا پلازہ انتظامیہ اور دکان مالکان کو نوٹس جاری کر دیئے گئے ہیں، اس کے علاوہ رمپا پلازہ کے خطرناک حصے کے استعمال پر پابندی عائد کر دی گئی ہے۔
ایس بی سی اے کا مزید کہنا تھا کہ عمارت محفوظ قرا ر دینے تک استعمال نہیں ہوسکے گی، رمپا پلازہ میں غیر اجازت سرگرمی پر سخت ایکشن لیا جائے گا۔
واضح رہے کہ ہفتے کی شب گل پلازہ میں لگنے والی آگ کے نتیجے میں 81 افراد لاپتہ ہیں اور فی الحال 74 لاپتہ افراد کی تصدیق ہوئی ہے جبکہ 28 افراد جاں بحق ہوچکے ہیں۔
