فلموں میں پاکستانیوں کو دہشتگرد دکھایا جاتا ہے :جمائما خان
لندن (آن لائن )چیئرمین تحریک انصاف عمران خان کی سابق اہلیہ و برطانوی فلم پروڈیوسر جمائما خان نے کہا ہے کہ ٹی وی میں مسلمان کی مثبت تصویر بہت کم دکھائی جاتی ہے۔
پاکستانیوں کو ہمیشہ دہشتگرد یا خودکش بمبار کے طور پر دکھایا جاتا ہے ۔برطانوی نشریاتی ادارے کو انٹرویو دیتے ہوئے 49 سالہ جمائما خان نے اپنی فلم ‘وٹس لو گاٹ ٹو ڈو وِد اِٹ’بارے کہا کہ فلم میں اسلاموفوبیا جیسے اہم مسئلے کو چیلنج کیا گیا ہے ۔ یہ فلم کسی حد تک ان کی ذاتی زندگی سے
متاثر ہے ، جب انہوں نے لاہور میں اپنے سابق شوہر عمران خان کی ساتھ 10 سال گزارے ۔عمران خان کی سابق اہلیہ نے مزید کہا کہ میرے بیٹوں سلیمان اور قاسم سے انگریزی نام نہ ہونے کی وجہ سے ایئرپورٹس پر غیر معمولی پوچھ گچھ کی جاتی ہے ۔ جب وہ سفر کیلئے ایئرپورٹ جاتے ہیں تو پرواز پر بیٹھنے سے قبل کئی گھنٹے انتظار کرنا پڑتا ہے ، تاہم مجھ سے پوچھ گچھ نہیں ہوتی۔ جمائما خان نے مزید کہا کہ اسلامو فوبیا، نسل پرستی جتنا بڑا مسئلہ ہے ۔ اس فلم میں پاکستانی کلچر کی بھی عکاسی ہے کیونکہ یہ پاکستانی نژاد کرداروں کے گرد گھومتی ہے ۔ فلم 24 فروری کو برطانیہ کے سینما گھروں میں ریلیز کی جائے گی۔
