شیخ حسینہ نے اقتدار کیلئے انسانیت کیخلاف جرائم کئے :اقوام متحدہ
ڈھاکہ(مانیٹرنگ ڈیسک)اقوام متحدہ نے بنگلہ دیش کی سابق وزیراعظم شیخ حسینہ کی حکومت کو انسانیت کے خلاف جرائم کا مرتکب قرار دے دیا ۔
اقوام متحدہ کی فیکٹ فائنڈنگ رپورٹ میں کہا گیا ہے کہ حسینہ حکومت کے خلاف گزشتہ سال طلبا نے ملک بھر میں احتجاج کیا جس پر شیخ حسینہ نے منظم انداز میں کریک ڈاؤن کیا اور اس دوران سینکڑوں ماورائے عدالت قتل کئے گئے ۔یو این رپورٹ میں گزشتہ سال یکم جولائی سے 15 اگست تک بنگلہ دیش میں پیش آنے والے واقعات کا احاطہ کیا گیا ہے ۔اقوام متحدہ کے انسانی حقوق دفتر کا کہنا ہے کہ ان کے پاس یہ بات کہنے کی معقول وجوہات موجود ہیں کہ شیخ حسینہ حکومت انسانیت کے خلاف جرائم، قتل، تشدد، قید و بند اور بہت سے انسانیت سوز اقدامات میں ملوث رہی ہے ۔رپورٹ میں کہا گیا ہے کہ حکومت نے یہ جرائم شیخ حسینہ کی جماعت عوامی لیگ پارٹی کے پرتشدد عناصر کے ساتھ ملکر کیے جبکہ سکیورٹی اور انٹیلی جنس سروسز بھی ان سب اقدامات میں شامل رہی ہیں ۔واضح رہے طلبا احتجاج کے دوران کم ازکم 1400 افراد جاں بحق ہوئے ۔ شدید احتجاج کے بعد سابق وزیراعظم شیخ حسینہ ملک چھوڑ کر بھارت فرار ہوگئی تھیں ۔
