کرنل صوفیہ کو دہشتگردوں کی بہن کہنے پر وزیرکیخلاف مقدمہ درج کرنیکا حکم
نئی دہلی (مانیٹرنگ ڈیسک )بھارتی ریاست مدھیا پردیش کی ہائی کورٹ نے بھارتی فوج کی مسلمان افسر کرنل صوفیہ قریشی سے متعلق نامناسب الفاظ کہنے پر حکمران بھارتیہ جنتا پارٹی کے ریاستی وزیر کنور وجے شاہ کے خلاف مقدمہ درج کرنے کا حکم دے دیا۔
بی جے پی سے تعلق رکھنے والے ریاستی وزیر وجے شاہ نے ایک تقریب میں کہا تھا کہ مودی نے دہشت گردوں کی بہن کرنل صوفیہ قریشی کو سبق سکھانے کے لئے آگے کر دیا ہے ۔کرنل صوفیہ قریشی کو دہشت گردوں کی بہن کہنے پر کانگریس کے کارکنوں نے بھارتی وزیر کے خلاف مظاہرہ کیا ۔ کانگریس کے مشتعل کارکنوں نے بی جے پی کے ریاستی وزیر وجے شاہ کے نام کی تختی پر سیاہی پھینک دی۔بی جے پی رہنما کے مسلمانوں کے خلاف نفرت انگیز بیان کے بعد ایک نئی بحث چھڑ گئی ہے اور کانگریس رہنماؤں نے بھارتیہ جنتا پارٹی کے وزیر سے فوری مستعفی ہونے کا مطالبہ کیا ہے ۔
