امریکی فوج میں اجتماعی قبریں کھودنے کی ٹریننگ شروع
مشق کا مقصد مستقبل کی شدید جنگ میں لاشوں کی شناخت کاطریقہ جانچنا خندقوں میں فرضی انسانی باقیات رکھ کر دیکھاکہ مٹی ڈالنے سے نقصان نہ پہنچے
واشنگٹن(این این آئی )امریکا میں ایک غیر معمولی فوجی مشق کے دوران بڑی تعداد میں ہلاک ہونے والے فوجیوں کی عارضی تدفین کے لیے اجتماعی قبریں کھودنے کی تربیت دی جارہی ہے .امریکی فوج کے مطابق یہ مشق تقریبا سات دہائیوں بعد اس نوعیت کی بڑے پیمانے کی تیاریوں میں سے ایک ہے ، جس کا مقصد مستقبل کی شدید جنگ میں بڑے پیمانے پر جانی نقصان کی صورت میں فوجی لاشوں کو محفوظ رکھنے اور بعد ازاں شناخت کے بعد اہل خانہ کے حوالے کرنے کا طریقہ جانچنا ہے ۔یہ مشق آپریشن کووینٹ کے دوسرے مرحلے کے تحت ہوئی۔ فوجی انجینئرز نے بھاری بلڈوزروں کے ذریعے ایسی خندقیں تیار کیں جن میں فرضی انسانی باقیات رکھ کر دیکھا گیا کہ مٹی ڈالنے کے باوجود انہیں نقصان نہ پہنچے ۔بعد میں باقیات کو نکال کر یہ جانچا گیا کہ مستقبل میں فرانزک ماہرین انہیں شناخت کے لیے محفوظ طریقے سے نکال سکتے ہیں۔امریکی فوج کے مطابق ایک معیاری عارضی تدفینی پلاٹ میں پانچ متوازی خندقیں شامل ہوسکتی ہیں، جن میں مجموعی طور پر تقریبا 100 لاشیں رکھی جاسکتی ہیں۔ حالیہ مشق میں ڈی بلڈوزر 6کے ذریعے ایک خندق میں تقریبا 20 باقیات کی گنجائش تیار کرنے میں اوسطا ایک گھنٹہ 15 منٹ لگے ۔فوج نے حساب لگایا کہ مناسب مشینری اور مسلسل آپریشن کی صورت میں ایک انجینئر کمپنی 24 گھنٹوں میں 2,400 تک باقیات کے لیے خندقیں تیار اور بند کرسکتی ہے ۔
Comments / رائے دیں
Share your thoughts. Comments are reviewed before they appear publicly.
Approved Comments