پنجاب یونیورسٹی فوج ،پولیس شہدا کے بچوں کومفت تعلیم دیگی
پنجاب یونیورسٹی کا پاک فوج اور پولیس کے شہدا کو خراج تحسین پیش کرنے کے لئے خصوصی اقدام
لاہور(اپنے سٹاف رپورٹر سے )پنجاب یونیورسٹی نے رواں سال داخلوں میں شہدا کے بچوں کے لئے خصوصی کوٹے کا اعلان کر دیا۔پاک فوج اورپولیس کے شہدا کے بچوں کو مفت تعلیم دی جائے گی۔پنجاب یونیورسٹی نے شہدا کے بچوں کے لئے ہر شعبے میں دو دو سیٹیں مختص کر دی ہیں۔ وائس چانسلر پنجاب یونیورسٹی ڈاکٹر نیاز احمد نے اس حوالے سے کہا کہ بی ایس اور ماسٹرز کی سطح پر شہدا کے بچوں کو رواں سال سے خصوصی کوٹے پر داخلہ دیں گے ۔شہدا کے بچوں کو پانچ ہزار روپے ماہانہ سکالرشپ بھی دیا جائے گا۔شہدا کے بچوں کو ہاسٹل میں مفت رہائش کی سہولت بھی میسر رہے گی۔انہوں نے کہا کہ کوٹے کے علاوہ میرٹ پر داخلہ لینے والے شہدا کے بچوں کو بھی مفت تعلیم اور سکالرشپس دیں گے ۔شہدا کا ہم پر حق ہے ، کچھ بھی کرکے ان کا حق ادا نہیں کر سکتے ۔شہدا کے خاندان کی ہر ممکن مدد ہر پاکستانی پر فرض ہے ۔شہدا کی بدولت آج ہم آزادی میں سانس لے رہے ہیں۔
