یوریا کھاد قیمتیں:صوبائی حکومتیں مارکیٹ کی نگرانی کریں ،ڈار
اسلام آباد (اے پی پی)نائب وزیراعظم و وزیر خارجہ اسحاق ڈار نے کہا کہ گیس کی مسلسل فراہمی سے کھاد کے پلانٹس پوری صلاحیت کے ساتھ چل سکیں گے ، کافی پیداوار اور بفر سٹاک کے ساتھ یوریا بیگ کی قیمت مستحکم رہے گی۔
مستحکم قیمت کسانوں اور دیہی معیشت کے لیے ایک چھی خبر ہے ، صوبائی حکومتیں مارکیٹ کی نگرانی میں اضافہ کریں تاکہ منافع خوروں کو قلت پیدا کرنے کا کوئی موقع نہ ملے ۔ ان خیالات کا اظہار انہوں نے اپنی زیر صدارت یوریا کی دستیابی کے حوالے سے دفتر خارجہ میں منعقدہ اجلاس کے دوران کیا۔ اجلاس میں موجودہ خریف کے دوران یوریا کی دستیابی اور قیمتوں پر اطمینان کا اظہار کیا گیا اور آنے والے ربیع سیزن کے دوران گندم کی بوائی کے لیے کھاد کی وافر مقدار اور مناسب قیمت پر دستیابی کو یقینی بنانے کے لیے مختلف اقدامات پر غور کیا گیا۔ اجلاس میں فیصلہ کیا گیا کہ پیٹرولیم ڈویژن اس بات کو یقینی بنائے گا کہ تمام فرٹیلائزر پلانٹس کو ربیع سیزن کے لیے گیس کی مسلسل فراہمی کی جائے ۔ گیس کی مسلسل فراہمی سے درآمدات اور زرمبادلہ کے نقصان کو بچایا جا ئے ۔
