طلبہ اے آئی اورڈی ٹی میں مہارت حاصل کریں ،مرادشاہ
کراچی (اسٹاف رپورٹر)وزیراعلیٰ سندھ مراد علی شاہ نے کہا ہے کہ ہمارے نوجوان میں عالمی سطح پر معنی خیز کردار ادا کرنے کی بے پناہ صلاحیتیں موجود ہیں۔
انہوں نے گریجویٹس طلبہ کو مشورہ دیتے ہوئے کہا کہ آپ ہمدردی، دیانتداری اور سماجی ذمہ داری کے ساتھ رہنمائی کریں اور حقیقی قیادت ذاتی کامیابی سے بالاتر ہوتی ہے ۔ انہوں نے یہ بات ہفتے کو آئی بی اے کراچی کے کانووکیشن سے خطاب کرتے ہوئے کہی۔ وزیراعلیٰ نے کہا کہ محنت اور لگن سے کامیاب تمام گریجویٹس کو مبارکباد دیتا ہوں، آج ہم آپکی تعلیمی کامیابیوں اور استقامت کا جشن منا رہے ہیں ، جو آپ کے والدین اور اساتذہ کی محنت سے آپ کی قابلیت اجاگر ہوئی ہے ۔وزیراعلیٰ نے کہا کہ تعلیم، قیادت اور جدت کے 70 برس آئی بی اے کراچی اگلے سال مکمل کرے گا۔ انہوں نے مزید کہا کہ 70 سالہ کی ہنر کو پروان چڑھانے اور رہنماؤں کی تشکیل آئی بی اے کی میراث ہے ۔ یہ سنگ میل آئی بی اے فیکلٹی، انتظامیہ اور طلباء کی لگن اور وژن کی عکاسی کرتا ہے ۔
آئی بی اے کراچی کی تعلیمی فضیلت سے وابستگی اس تقریب کا مرکزی نقطہ ہے ۔ آئی بی اے کی 67 فیصد فیکلٹی کے پاس پی ایچ ڈی کی ڈگریاں ہیں۔ یہ انسٹیٹیوٹ ایک بہترین تعلیمی ماحول کو فروغ دینا جاری رکھے ہوئے ہے ۔ وزیراعلیٰ نے قوم کی تشکیل میں آئی بی اے جیسے اداروں کے اہم کردار پر زور دیا۔ انہوں نے کہا کہ آپ (طلبہ) کو آرٹیفیشل انٹیلی جنس ، ڈیٹا سائنس اور ڈیجیٹل ٹرانسفارمیشن میں مہارت حاصل کریں ۔ انہوں نے فخر کرتے ہوئے کہا کہ ہمارے نوجوان میں عالمی سطح پر معنی خیز کردار ادا کرنے کی بے پناہ صلاحیتیں موجود ہیں۔ آئی بی اے کراچی کے 18000 سابق طلباء کا نیٹ ورک اہم اثاثہ ہے ، سابق طلباء نے مختلف شعبوں میں قابل ذکر خدمات کی ہیں ۔ طلبہ نے یہاں جو علم اور مہارت حاصل کی ہے اسے معاشرے میں مثبت تبدیلی لائیں۔ ایگزیکٹو ڈائریکٹر آئی بی اے ڈاکٹر اکبر زیدی نے تقریب میں شرکت کرنے پر وزیراعلیٰ کا شکریہ ادا کیا۔ وزیراعلیٰ نے کانووکیشن میں پوزیشن ہولڈرز کو میڈلز اور اسناد تقسیم کیں۔
