اپنی چھت ،اپنا گھر پروگرام کیلئے62ارب منظور:چاہتی ہوں ہر بے گھر کے پاس چھت ہو:مریم نواز
لاہور (مانیٹرنگ ڈیسک،آن لائن) وزیر اعلیٰ پنجاب مریم نواز نے اپنی چھت، اپنا گھر پروگرام کیلئے 62 ارب روپے کی منظوری دے دی ۔وزیر اعلیٰ نے مئی تک 40ہزار افراد کو قرضے دینے کاہدف مقررکر دیا۔وزیر اعلیٰ کی زیر صدارت خصوصی اجلاس میں اپنی چھت، اپنا گھر پروگرام سے متعلق اہم فیصلے کئے گئے ۔
مریم نواز نے اپنی چھت،اپنا گھر پروگرام کے قرضے دینے کا عمل جلد مکمل کرنے کی ہدایت کی اوراس حوالے سے قرض 15 سے 20لاکھ کرنے کی تجویز کا جائزہ لینے کا حکم بھی دیا۔ مریم نواز نے کہاکہ چاہتی ہوں ہر بے گھر کے پاس اپنی چھت ہو۔ اپنا گھر ہر شہری کا بنیادی حق ہے ۔ اس موقع پر بریفنگ کے دوران بتایا گیا کہ پنجاب بھر میں تقریباً5 ہزار افراد اپنی چھت،اپنا گھر پروگرام کے تحت قر ض لے چکے ہیں۔ اس پروگرام کے تحت 4200سے زائد گھرتیزی سے تکمیل کی طرف گامزن ہیں جبکہ روڈااورہاؤسنگ اینڈاربن ڈویلپمنٹ کے اشتراک سے نادار خاندانوں کو بھی بنے بنائے گھر دیئے جا رہے ہیں ۔