پختونخوا حکومت کے 2 وفد افغانستان جائینگے، ٹی او آر تیار، وفاق کا دائرہ اختیار : دفتر خارجہ
پشاور،اسلام آباد (مانیٹرنگ ڈیسک) خیبر پختونخوا حکومت نے افغانستان کے دورے کیلئے ٹی اوآرز تیارکر لئے، افغان طالبا ن سے امن وامان کے معاملے پر بات چیت کیلئے 2وفد افغانستان جائیں گے جبکہ دفترخارجہ کا کہناہے کہ خارجہ امور وفاق کے دائرہ اختیار میں آتے ہیں۔
مشیر اطلاعات خیبر پختونخوا بیرسٹر محمد علی سیف نے افغان عبوری حکومت سے بات چیت کے لئے وفد افغانستان بھیجنے کی تصدیق کرتے ہوئے کہا کہ افغانستان کے دورے کے لئے ٹی او آرز تیار کر لئے گئے ہیں۔ٹی او آرز کے مطابق افغان طالبان سے بات چیت کے لئے دو وفد افغانستان جائیں گے ، پہلاوفد مذاکرات کے لئے ماحول سازگاربنائے گا اور سفارتی امور نمٹائے گا جبکہ دوسرا وفد کئی اسٹیک ہولڈرز پر مشتمل ہوگا۔مشیراطلاعات کے پی بیرسٹرسیف کو رابطہ کاری کیلئے فوکل پرسن نامزد کیا گیا ، خیبرپختونخواحکومت مذاکرات کیلئے وفاقی حکومت سے رابطے میں رہے گی۔ٹی او آرز کے مطابق وفد بھیجنے کا مقصدکراس بارڈر ٹرائبل ڈپلومیسی مضبوط کرنے کے علاوہ اقتصادی اور معاشرتی تعلقات کو فروغ دینا ہے۔ ترجمان دفتر خارجہ نے مشیر اطلاعات خیبر پختونخوا بیرسٹر محمد علی سیف کے افغانستان سے متعلق بیان پر ردعمل میں کہاہے کہ ملکی خارجہ امور وفاق کے دائرہ کار میں آتے ہیں،بیرسٹر سیف کا افغانستان کے دورے سے متعلق ایک بیان نظر سے گزرا ہے ، مشیر اطلاعات خیبر پختونخوا نے اپنے بیان میں کہا تھا کہ وہ اپنی تیاری کر کے وفاق سے رابطہ کریں گے۔
