لاہور :خودکش بمبار گرفتار،ساتھی فرار
لاہور(مانیٹرنگ ڈیسک)لاہور میں برکی روڈ کے قریب سی ٹی ڈی پولیس نے کارروائی کرتے ہوئے کالعدم تحریک طالبان پاکستان کے مبینہ خودکش بمبار کو گرفتار کرلیا، جبکہ ایک دہشت گرد زخمی حالت میں فرار ہوگیا۔
ترجمان سی ٹی ڈی کے مطابق سی ٹی ڈی نے خفیہ اطلاع کی بنیاد پر دہشت گردوں کی گرفتاری کے لیے برکی روڈ کے قریب کارروائی کی، جس میں دہشت گردوں کے ساتھ شدید فائرنگ کے تبادلے کے بعد ایک خود کش دہشت گرد کو گرفتار کر لیا گیا، جبکہ اس کا زخمی ساتھی فرار ہونے میں کامیاب ہوگیا۔ خود کش بمبار کی شناخت حافظ شمس کے نام سے ہوئی ہے ، جو بلوچستان کا رہائشی ہے اور اس کا تعلق کالعدم تحریک طالبان پاکستان سے ہے ، خودکش بمبار کے قبضے سے خودکش جیکٹ، سیفٹی فیوز وائر اور بارودی مواد برآمد ہوا ہے ۔دہشت گردوں کی اطلاع ملتے ہی اعلیٰ پولیس افسران موقع پر پہنچ گئے ، جبکہ سی ٹی ڈی ٹیموں نے برکی کے نواحی علاقوں کو گھیرے میں لے کر سرچ آپریشن شروع کردیا ہے ۔ترجمان سی ٹی ڈی کے مطابق دہشت گرد لاہور پربڑے حملے کی منصوبہ بندی مکمل کرچکے تھے ، مگر بروقت کارروائی سے شہر بڑی تباہی سے بچ گیا۔ سی ٹی ڈی نے مقدمہ درج کر کے مزید تفتیش شروع کر دی ہے ۔
