ایک بھی وعدہ پورا نہیں ہوا ایم کیو ایم کا حکومت سے علیحدگی کیلئے رابطہ کمیٹی کا اجلاس طلب
اسلام آباد(سٹاف رپورٹر،دنیا نیوز،مانیٹرنگ ڈیسک) ایم کیو ایم نے ایک بار پھر وفاقی حکومت سے الگ ہونے کا عندیہ دے دیا۔ایم کیو ایم کے رکن قومی اسمبلی امین الحق کا کہنا تھا ہم نے رابطہ کمیٹی کا اجلاس بلا لیا ہے جس میں اپوزیشن بینچوں پربیٹھنے پر مشاورت کریں گے۔
پارلیمنٹ میں میڈیا سے گفتگو کرتے ہوئے امین الحق نے کہا مرکزی کمیٹی کے اجلاس میں فیصلہ کیا جائے گا کہ آزاد حیثیت میں یا اپوزیشن بینچز پر بیٹھیں گے ۔ ہماری خواہش تھی شہباز شریف وزیراعظم بنیں لیکن ایم کیو ایم کے ساتھ جو وعدے کیے گئے تھے وہ پورے نہیں ہوئے ۔ شہباز شریف حکومت نے ایم کیو ایم کے ساتھ سندھ اور حیدرآباد کے پیکیج پر وعدہ کیا تھا گزشتہ ڈیڑھ سال سے حکومت نے ایم کیو ایم سے کیا گیا ایک بھی وعدہ پورا نہیں کیا، کراچی اور حیدرآباد پیکیج سمیت دیگرتحفظات موجود ہیں۔ انہوں نے کہا وفاقی حکومت اور مسلم لیگ(ن)کا ایم کیو ایم سے رویہ اچھا نہیں، ترقیاتی پیکیج پرکہیں پر کام ہوتا ہوا نظر نہیں آرہا ، پارٹی وفاقی حکومت سے علیحدگی سمیت اپوزیشن بینچز پر بیٹھنے پر مشاورت کرے گی۔
