عرصہ بعد لاہور میں رات کو ستارے نظر آرہے :ہائیکورٹ
لاہور(آئی ا ین پی )لاہور ہائیکورٹ میں ماحولیاتی آلودگی اور اسموگ کے خلاف درخواستوں پر سماعت کے دوران جسٹس شاہد کریم نے ریمارکس دئیے کہ بڑے عرصے بعد لاہور میں ایسا موسم دیکھ رہا ہوں کہ رات کو ستارے نظر آ رہے ہیں، سب کو شاباش، یہ آپ سب کی محنت کا ثمر ہے ۔
واسا کے وکیل نے عدالت کو آگاہ کیا کہ دو لاکھ واٹر میٹر لگانے کے لیے پی این ڈی کو سمری بھیج دی گئی ہے ۔ اس پر عدالت نے ہدایت کی کہ سمری پر جلد عملدرآمد کرایا جائے ۔ جسٹس شاہد کریم نے گلبرگ میں ٹریفک کے مسائل پر برہمی کا اظہار کرتے ہوئے کہا کہ چار ہزار کاریں اتنی چھوٹی جگہ پر ہوں تو آلودگی کی کیا صورتحال ہوگی۔ عدالت نے ہدایت دی کہ گلبرگ میں موجود سکولوں کے سامنے کی جگہ کو درست کیا جائے ۔ وکیل ایل ڈی اے نے بتایا کہ گلبرگ کے سکولوں کے لیے ٹریفک کو ون وے کیا گیا ہے اور لاہور کے 82 مقامات پر ٹریفک کا شدید دباؤ رہتا ہے ۔ ایل ڈی اے کے وکیل نے عدالت کو آگاہ کیا کہ پودے لگانے کا پائلٹ پراجیکٹ شروع کر دیا گیا ہے ، جبکہ گلبرگ کے سکولوں میں روزانہ تین سے چار ہزار گاڑیاں آتی ہیں، جس پر جسٹس شاہد کریم نے کہا کہ بار بار کہتا ہوں کہ بسوں کی پالیسی پر عملدرآمد کرائیں۔ جسٹس شاہد کریم نے ریمارکس دئیے کہ ٹریفک پولیس کا کام سکولوں کی ٹریفک کو کنٹرول کرنا نہیں ہے ۔ عدالت نے آئندہ سماعت پر عملدرآمد کی رپورٹ طلب کر لی۔
