ہائیکورٹ:اسحاق ڈار کی نائب وزیراعظم تقرری کیخلاف انٹرا کورٹ اپیل مسترد
لاہور( کورٹ رپورٹر)لاہور ہائیکورٹ نے نائب وزیراعظم اسحاق ڈار کی تقرری کیخلاف انٹرا کورٹ اپیل پر فیصلہ سناتے ہوئے اپیل کو ناقابل سماعت قرار دیکر مسترد کردیا ۔جسٹس چودھری اقبال کی سربراہی میں دو رکنی بینچ نے اپیل پر محفوظ فیصلہ سنایا۔
سنگل بینچ کے فیصلے کیخلاف خاتون اشبا کامران نے انٹرا کورٹ اپیل دائر کررکھی تھی جس میں وفاقی حکومت ودیگر کو فریق بناکر موقف اختیار کیا گیا کہ آئین میں ڈپٹی وزیراعظم کا کوئی عہدہ نہیں ۔وزیراعظم شہباز شریف نے وزیر خزانہ اسحاق ڈار کو ڈپٹی وزیراعظم مقرر کیا جو غیر قانونی اور اختیارات کا ناجائز استعمال ہے ،سنگل بینچ نے درخواست پر قانون کے برعکس فیصلہ دیا، عدالت کالعدم قرار دے ۔ وفاقی حکومت کے وکیل نے دلائل میں بتایا رولز آف بزنس ڈپٹی وزیراعظم تعینات کرنے کا اختیار دیتے ہیں اپیل ناقابل سماعت ہے عدالت مسترد کرے ۔ عدالت نے اپیل کو ناقابل سماعت قرار دیکر مسترد کردیا۔
