نہروں کیخلاف وکلاکا ببرلو بائی پاس پر دھرنا، 3صوبوں کا زمینی رابطہ منقطع
سکھر (مانیٹرنگ ڈیسک) دریائے سندھ سے 6 کینال نکالنے کے خلاف وکلا نے ببرلو بائی پاس پر دھرنا دے رکھا ہے ، جس کے باعث سندھ پنجاب ٹریفک معطل ہوگئی۔
صدر کراچی بار کونسل عامر نواز وڑائچ کی قیادت میں وکلا نے جمعہ کی صبح سے دھرنا دے رکھا ہے ، جبکہ سندھ کے دیگر شہروں سے بھی وکلا دھرنے میں شریک ہوئے ۔ ببر لو بائی پاس بند ہونے سے 3 صوبوں کازمینی رابطہ منقطع ہوگیا ۔سکھر ٹول پلازہ پر پنجاب اور بلوچستان جانے والا ٹریفک بند کر دیا گیا، جس کے باعث مسافروں اور ٹرانسپورٹرز کو مشکلات کا سامنا ہے ۔ روہڑی ٹول پلازہ سے احتجاج کے مقام تک ٹریلرز اور چھوٹی بڑی گاڑیوں کی قطاریں لگ گئیں۔ اس موقع پر گفتگو کرتے ہوئے صدر کراچی بار کونسل عامر وڑائچ نے کہا کہ کراچی سے سکھر تک ہر ضلع میں ہمارا بھرپور استقبال کیا گیا ، 4 مطالبات کے لیے احتجاجی دھرنا دیا ہے ، پہلی ترجیح متنازع کینالز کا خاتمہ ہے ۔ وکلا کے دھرنے میں رہنما جے یو آئی مولانا راشد محمود سومرو بھی شریک ہوئے اور کہا کہ کینالز کا مسئلہ فرد واحد کا نہیں بلکہ پورے سندھ کا مسئلہ ہے ، اگر ہمارا مطالبہ پورا نہیں کیا گیا تو کموں شہید سندھ پنجاب بارڈر پر احتجاجی دھرنا دیں گے اور ایک کنٹینر بھی کموں شہید سے گزرنے نہیں دیں گے ۔ دوسری جانب وکلا نے کشمور کے مقام پر بھی سندھ پنجاب انڈس ہائی وے پر دھرنا دیا جس سے سندھ پنجاب شاہراہ بند ہوگئی۔ سڑکیں بند ہونے سے مسافروں کو پریشانی کا سامنا ہے ۔ اس کے علاوہ ضلع بار کونسل نے نئی کینالز کی تعمیر کے خلاف بطور احتجاج کشمور میں عدالتی کارروائیوں کا غیرمعینہ مدت کے لیے بائیکاٹ کردیا۔
