ملک میں جمہوریت نہیں ،عجیب کیفیت چل رہی :عمرایوب
لاہور(مانیٹرنگ ڈیسک)قومی اسمبلی میں اپوزیشن لیڈر عمر ایوب نے کہا ہے کہ اس وقت ہم مشکل حالات سے گزررہے ہیں، ملک میں جمہوریت نہیں ، عجیب سی کیفیت ملک میں چل رہی ہے ،ہماری قیادت کیخلاف سارے بوگس کیسز بنائے گئے ۔
ن لیگی وزیر یہ کہتے ہیں کہ عمران خان معافی مانگ لے تو سب کیسز معاف ہوجائینگے ،وہ باہر آجائینگے ، اس کا مطلب یہ ہے کہ عمران خان پر سارے کیسز جھوٹے ہیں، نومئی کے حوالے سے سی سی ٹی وی فوٹیجز سامنے لائی جائیں۔دنیا نیوز کے پروگرام ’’ٹونائٹ ودثمر عباس ‘‘میں گفتگو کرتے انہوں نے کہا حکومت سے مذاکرات میں ہم نے بانی تک رسائی کی شرط رکھی تھی، حکومتی افرادکاکہناتھاکہ رسائی نہ دیناہماری مجبوری ہے ،ہمیں ملنے بھی نہیں دیاجاتا،بیرسٹرگوہربطوروکیل بانی سے ملاقات کرلیتے ہیں، طلال چودھری کومشورہ ہے وہ ن لیگ کی تنظیم سازی پرتوجہ دیں۔عمرایوب نے کہا بشریٰ بی بی تک وکلا کی رسائی نہیں ہورہی،وہ کیسے کسی کی رسائی روکیں گی ۔ ایسی کوئی بات نہیں کہ سلمان اکرم راجہ پارٹی کو سکول کی طرح چلارہے ہیں، پی ٹی آئی میں کوئی فارورڈ بلاک نہیں بنے گا، ووٹ بیچنے والوں کو بھی پارٹی سے نکال دیا گیا ہے ،میں نے استعفیٰ اپنی مرضی سے دیاتھا۔ مقتدرہ سے مذاکرات کا کوئی معاملہ نہیں چل رہا، بطوراپوزیشن لیڈرمقتدرہ کے کسی نمائندے سے ملاقات نہیں ہوئی۔
