پنجاب : برسوں سے رائج برتھ اور ڈیتھ رجسٹریشن فیس ختم : آسانیاں پیدا کررہے : مریم نواز
لاہور(نمائندہ دنیا)وزیراعلیٰ پنجاب مریم نواز نے برسوں سے رائج برتھ اور ڈیتھ رجسٹریشن فیس ختم کردی ہے پنجاب میں برتھ و ڈیتھ رجسٹریشن رولز 2025 نافذ ہوگئے۔
پنجاب بھر میں اب برتھ اور ڈیتھ کی رجسٹریشن بلامعاوضہ کرائی جاسکے گی- مریم نواز کی ہدایت پر برتھ اور ڈیتھ کمپیوٹرائزڈ سرٹیفکیٹ بھی مفت جاری ہوگا اور شہری یونین کونسل اور میونسپل کمیٹی میں 7سال تک بلامعاوضہ اندراج کراسکتے ہیں -پنجاب میں برتھ اور ڈیتھ کی لیٹ رجسٹریشن پر کورٹ ڈگری کی شرط بھی ختم کردی گئی ۔وزیراعلی ٰنے کہاکہ شناخت ہر شہری کا بنیادی حق ہے ، شہریوں کے لئے آسانیاں پیدا کرنا چاہتے ہیں -سروسز کے حصول کے لئے ڈیتھ اوربرتھ ڈیجیٹل سر ٹیفکیٹ لازم ہے - انہوں نے کہاکہ پنجاب کے شہری برتھ اور ڈیتھ کا بروقت اندراج کرا کراپنے شہری حقوق کا تحفظ یقینی بنا سکتے ہیں ۔وزیر اعلیٰ پنجاب مریم نواز نے تیز آندھی اور بارش کے سبب مختلف حادثات میں قیمتی انسانی جانوں کے ضیاع پر گہرے رنج و غم کا اظہار کیاہے ۔مریم نواز شریف نے سوگوار خاندانوں سے دلی ہمدردی وتعزیت کا اظہار کیا ہے۔ انہوں نے ہدایت کی ہے کہ زخمی افراد کو فوری اور بہترین طبی امداد فراہم کی جائے -ریسکیو 1122،پی ڈی ایم اے اور ضلعی انتظامیہ کو بحالی و امدادی سرگرمیاں تیز کرنے کی ہدایت بھی کی۔پی ڈی ایم اے کو نقصانات کی تفصیلی رپورٹ پیش کرنے کا حکم دیا اور کہاکہ پنجاب حکومت غم کی اس گھڑی میں متاثرہ خاندانوں کے ساتھ ہے۔شدید موسمی حالات میں عوام کی جان و مال کے تحفظ کے لئے تمام تر ممکنہ اقدامات بروئے کار لا رہے ہیں۔
