مردان کے پہاڑوں سے 4 افراد کی گلے کٹی لاشیں برآمد
مردان (این این آئی)خیبرپختونخوا کے شہر مردان کی تحصیل کتلان کے علاقے بابوزئی کی پہاڑیوں سے 4 افراد کی گلے کٹی لاشیں برآمد ہوئی ہیں۔
ذرائع نے بتایا کہ جاں بحق ہونے والوں میں ایک مقامی نوجوان شامل ہے جب کہ باقی 3 افراد کا تعلق صوبے کے مختلف اضلاع سے ہے ۔اطلاعات کے مطابق یہ واقعہ بیزئی تھانے کی حدود میں پیش آیا ، جہاں مقامی لوگوں نے بابوزئی کی پہاڑیوں میں لاشیں دیکھ کر پولیس کو اطلاع دی۔اطلاع ملنے پر پولیس موقع پر پہنچی، لاشوں کو تحویل میں لے کر ہسپتال منتقل کردیا، ذرائع نے بتایا ہے کہ مقامی نوجوان کو 4 روز قبل نامعلوم افراد نے اغوا کیا تھا۔مقامی جاں بحق نوجوان کی شناخت حامد غفور ولد رحم غفور کے نام سے ہوئی جو بابوزئی کا رہائشی اور ایک کرشنگ پلانٹ کا مالک تھا،دیگر جاں بحق افراد میں زبیر آفریدی ساکنہ باڑہ، شفق احمدساکنہ ہری پور، اور شہاب الدین ساکنہ دیر شامل ہیں۔ذرائع کے مطابق مقتولین کو 2 سے 3 روز قبل قتل کیا گیا اور ان کی لاشیں پہاڑی علاقے میں پھینک دی گئیں، لاشوں کی حالت انتہائی خراب بتائی جا رہی ہے ۔ضلعی پولیس کے ترجمان کے مطابق واقعے کے بعد علاقے کو گھیرے میں لے کر سرچ آپریشن شروع کر دیا گیا ہے ۔مقدمہ سی ٹی ڈی میں درج کر لیا گیا ۔
