بجٹ منظور نہ کرتے تو یہ کرپشن کیسے کرتے ،نوکریاں کیسے بیچتے :گورنر کنڈی
پشاور(این این آئی)گورنر خیبر پختونخوا فیصل کریم کنڈی نے کہا ہے کہ وزیراعلیٰ نے بڑا بیان دیا کہ ان کے خلاف ایجنسیاں کام کر رہی ہیں، سی ایم جواب دے کہ آپ کے خلاف ایف آئی آر کیسے ختم ہوئی؟ میڈیا سے گفتگو کے دوران فیصل کریم کنڈی نے کہا کہ 30 جون تک بجٹ پاس نہ ہو تو آپ فنانشل کرائس میں چلے جاتے ہیں۔
کے پی حکومت سونے کاانڈا دینے والی مرغی ہے ، میں نے پہلے کہا تھا انڈا دینے والی مرغی کو یہ کبھی ذبح نہیں کریں گے ۔انہوں نے کہا کہ اگر انہوں نے بجٹ پاس نہیں کیا تو یہ کرپشن کہاں سے کریں گے ، اگر یہ بجٹ پاس نہیں کریں گے تو کوہستان، گندم اور چینی سکینڈل کیسے بنائیں گے ؟۔ انہوں نے کہاکہ وزیراعلیٰ کی ترجیح بانی پی ٹی آئی سے ملاقات ہے ، وزیراعلیٰ کہتے ہیں جب تک قیدی سے ملاقات نہیں ہوتی بجٹ پاس نہیں کروں گا۔ اسمبلی سیشن کی سمری 12 جون کو میرے پاس پہنچی، گورنر کے پاس 14 دن میں سیشن بلانے کا اختیار ہے ۔ہم جمہوری لوگ ہیں، سازش نہیں کرتے ، ہم آئین کے مطابق کام کریں گے ۔
