فوادحسن فواد کے چینی درآمد کرنے پر تحفظات ،کئی سوالات
لاہور(مانیٹرنگ ڈیسک)سابق پرنسپل سیکرٹری فواد حسن فواد نے حکومت کی جانب سے 30 کروڑ ڈالر کی چینی برآمد کے بعد پھر سے درآمد کرنے کے معاملے پر کئی سوالات اٹھا دئیے۔
فواد حسن فواد نے ایکس پر اپنی پوسٹ میں لکھا کہ چینی کی 30 کروڑ ڈالر کی درآمد عوامی مفاد میں نہیں،اس کا فوراً جائزہ لیا جائے ، عام آدمی چینی کا بڑا صارف نہیں بلکہ اصل فائدہ خوراک و مشروبات کی صنعت کو ہوگا۔ پہلے چینی کی برآمد کی اجازت دی اور اب صنعتکاروں کو فائدہ پہنچانے کیلئے درآمد؟ ، اصل مسئلہ مافیا کا کردار ہے ، چینی انسانی صحت کیلئے خطرناک ہے ، قیمتی زرمبادلہ اس پر خرچ کیوں کیا جا رہا ہے ؟۔ انہوں نے کہا کہ عام آدمی نہ مشروبات خرید سکتا ہے اور نہ مٹھائیاں پھر ان کے نام پر درآمد کیوں؟ برآمد کی اجازت دینے پر کیا کوئی جواب دہ ہوگا؟،چینی مافیا، بروکرز اور ذخیرہ اندوزی کی تحقیقات کب ہوں گی؟ کیا ایف بی آر نے پچھلے 5 سال میں چینی کی صنعت کے منافع پر ٹیکس لیا؟۔
