پنجاب : بارشوں سے تباہی، ایک ہی خاندان کے 5 افراد سمیت 36 جاں بحق، دریائے جہلم میں سیلاب کی وارننگ
لاہور(کرائم رپورٹر، سٹاف رپورٹر سے، اپنے کامرس رپورٹر سے، نمائندگان، نامہ نگاران) پنجاب میں مون سون بارشوں نے ہرطرف تباہی مچادی، لاہور اور دیگر شہروں میں چھتیں، دیواریں گرنے اورکرنٹ لگنے سے ایک ہی خاندان کے پانچ افرادسمیت 36 افرادجاں بحق اور متعدد زخمی ہوگئے۔
آزاد کشمیر میں شدید سیلاب کا خدشہ ظاہر کیا گیا ہے جبکہ محکمہ موسمیات نے دریائے جہلم اور معاون ندی نالوں میں اگلے چوبیس گھنٹے کے دوران شدید طغیانی کا خدشہ ظاہر کرتے ہوئے احتیاطی تدابیر اختیار کرنے کا انتباہ جاری کر دیا،منڈی بہائوالدین میں بارشی پانی سے ڈسٹرکٹ جیل کی عقبی دیوار گر گئی اور پانی جیل کے احاطے میں داخل ہوگیا، ڈپٹی کمشنر ڈاکٹر فیصل سلیم نے بتایا کہ 843 قیدیوں کو دیگر جیلوں میں منتقل کیا جا رہا ہے جن میں سے 230 قیدیوں کو لاہور جبکہ 600 کو حافظ آباد جیل منتقل کر دیا گیا ہے ۔ لیسکوکے درجنوں فیڈرزٹرپ کرنے سے بجلی گھنٹوں غائب رہی ۔تفصیلات کے مطابق لاہورکے علاقے شفیق آباد میں گھر کی چھت گرنے سے ماں ایمان بی بی اور8سالہ بیٹی فضا جاں بحق جبکہ 12 سالہ سحر شدید زخمی ہوئی ۔ رائیونڈ کے علاقے مشن کالونی میں چھت گرنے سے ملبے تلے دب کر 70 سالہ نسرین، 8 سالہ میرب اور 80 سالہ بشیر دم توڑگئے ایک نوجوان 21 سالہ فرید کو زندہ نکال لیا گیا جبکہ کوٹ جمال پورہ میں چھت گرنے سے ایک شخص جاں بحق ہوا اور تین افراد کوملبے تلے سے زندہ نکال لیا گیا۔ ٹھوکر نیاز بیگ کے علاقے مریدوال گاؤں میں ایک مکان کی چھت گرنے سے ایک ہی خاندان کے پانچ افراددم توڑگئے اور دو زخمی ہوئے۔جاں بحق ہونیوالوں میں 60 سالہ مانگا، 55 سالہ عشرت بی بی، 35 سالہ رانی بی بی، 4 سالہ لطیفہ اور 3 سالہ خدیجہ جبکہ زخمیوں میں 30 سالہ فیصل اور 5 سالہ ببلی شامل ہیں۔
ابتدائی معلومات کے مطابق مکان بیس روز قبل تعمیر کیا گیا تھا اور چھت بانس اور سرکی سے بنائی گئی تھی۔ ادھر ہربنس پورہ کے علاقے برف خانہ سٹاپ کے قریب کرنٹ لگنے سے 15 سالہ اویس اور اس کی 13 سالہ بہن نشا موقع پردم توڑگئے ،دونوں بہن بھائیوں کو کرنٹ گھر میں موجود آہنی کپڑوں کی پیٹی سے لگا۔ شہر میں بارش کے باعث بجلی کا ترسیلی نظام بری طرح متاثر ہوا،رات گئے تک ہونے والی بارش سے لیسکو کے درجنوں فیڈرز ٹرپ کر گئے ،مختلف علاقوں میں گھنٹوں بجلی بند رہی جس سے شہریوں کومشکلات کاسامنارہا۔ادھر ساہیوال میں چھتیں گرنے سے محلہ آباد گھر نورشاہ میں 4سالہ انعم، 46/GDنورشاہ میں 50سالہ شفقت اور اڈہ جہان خان پاکپتن روڈپر 3سالہ امرین اور40سالہ سکینہ بی بی موقع پر ہی جاں بحق جبکہ مختلف مقامات پر 13افرادزخمی ہوئے ۔محمدنگر کے نواحی گاؤں65/EB میں مال مویشیوں کے کمرے کی چھت گرنے سے 52 سالہ سردار علی دم توڑگیا۔ ستگھرہ کے نواحی گاؤں 25/2R میں محنت کش کے مکان کی چھت گرنے سے گھر کا سربراہ واحد کفیل 40سالہ اللہ دتہ ، مرولہ شریف میں محنت کش کے کچے مکان کی چھت گرنے سے اسکی دو کمسن بچیاں10سالہ رباب اور3سالہ عنایا فاطمہ جاں بحق اور 6 افراد زخمی ہوگئے جبکہ 3 اضلاع کو ملانے والی شارع کے برساتی نالہ کا پل بھی بہہ گیا ،فیصل آباد میں رچنا ٹاؤن زم زم ٹیکسٹائل کے قریب چھت گرنے سے 50سالہ شمند علی اور 40سالہ ریاض بی بی جاں بحق ہو گئی، شیخوپورہ میں لاگر روڈ فیروز وٹواں میں مکان کی چھت گرنے سے بشیردم توڑگیا ، عثمان نگر حافظ آباد روڈ پر چھت گرنے سے میاں بیوی نازش زخمی اورخاوند اجمل جاں بحق ہوگیا جبکہ جھامکے سٹاپ سرگودھا روڈ پر چھت گرنے سے نگینہ زوجہ آصف موقع پر جاں بحق ہوگئی ، سانگلہ ہل کے محلہ پرانا چہور میں ایک خاتون چھت پر گئی پائپ کو ہاتھ لگا تو کرنٹ لگنے سے زندگی کی بازی ہار گئی، گورنمنٹ گرلز ہائیر سیکنڈری سکول مریدکے ٹاؤن کے قریب بارشی پانی کے جوہڑ میں نہانے کے دوران دو دوست سات سالہ حماد اور گیارہ سالہ عثمان ڈوب گئے ۔
لاشیں لواحقین کے حوالے کر دی گئیں۔ نارنگ منڈی میں نالہ بھیٹر میں طغیانی سے سینکڑوں ایکڑ رقبے پر فصلوں سمیت مہہ ورکاں آہدیاں دھروڑ مسلم مبارک پور سمیت دیگر ملحقہ علاقے ڈوب گئے ۔ حافظ آباد میں متعدد مقامات پر چھتیں اور دیواریں گرنے سے دوافرادزخمی جبکہ کئی دیہات زیر آب آگئے ،ملکوال کے محلہ کوٹلی کلاں میں 9 سالہ بچہ شاہ حسین سیوریج نالے میں ڈوب کر جاں بحق ہو گیا ، کامونکے میں کچے مکان کی چھت گرنے سے دو بھائی وکیل حسین اور شکیل زخمی ہوگئے ، وزیرآباد کے نواحی موضع منصور والی میں گھر کی چھت گرنے سے محنت کش میاں نیکسن مسیح اور 30 سالہ بیوی عنایا زخمی ہو گئے ، قصور کے علاقے گنڈا سنگھ والا کے گاؤں کھریپڑ میں بارش سے خستہ حال گھر کی چھت گرنے سے چھ افراد 3 سالہ عثمان، 10سالہ ثمر، 12 سالہ محمود، 32 سالہ ثمینہ بی بی ، 30 سالہ کبنان اور 4سالہ سہیل زخمی ہوگئے ۔قصور میں فیضان سکول سے ملحقہ گلی سے گزر رہا تھا کہ پانی میں موجود کرنٹ لگنے سے موقع پر ہی دم توڑ گیا،الہ آبادکے علاقہ گہلن ہٹھاڑ میں حنیف مویشیوں کیلئے چارہ کاٹنے والی مشین پر کام کر رہا تھا کہ شارٹ سرکٹ کے باعث کرنٹ لگنے سے موقع پر چل بسا۔ کھڈیاں خاص میں گلزار چوک محلہ بلوچانوالا میں مکان کی بوسیدہ چھت گرنے سے 75 سالہ خاتون بیٹے سمیت زخمی ہوگئی۔علاوہ ازیں پی ڈی ایم اے پنجاب نے بارشوں کے باعث نقصانات بارے رپورٹ جاری کی ہے جس کے مطابق حالیہ بارشوں میں اب تک مختلف حادثات کے باعث 77 شہری جاں بحق جبکہ 214 زخمی ہوئے ہیں۔
