انصاف کسی ایک ادارے کی ذمہ داری نہیں انسانیت کا اجتماعی فرض:چیف جسٹس
کوئٹہ،اسلام آباد (سٹاف رپورٹر،نیوز ایجنسیاں) چیف جسٹس پاکستان یحیی آفریدی نے کہا کہ انصاف کسی ایک فرد یا ادارے کی ذمہ داری نہیں بلکہ یہ انصاف انسانیت کا اجتماعی فرض ہے ۔
عالمی یوم انصاف پر اپنے پیغام میں انہوں نے مزید کہا کہ آج کے دن عدل، مساوات اور قانون کی حکمرانی کے عزم کی تجدید کرتے ہیں، انصاف کی حد سرحدوں سے ماورا ہے جو امن اور انسانی حقوق کی بنیاد ہے ، دنیا کے مسائل کا واحد حل قانون کی حکمرانی اور انصاف کی فراہمی ہے ، دہشت گردی، انسانی سمگلنگ، ماحولیاتی بحران جیسے مسائل کا حل عدالتی نظام ہے ، پاکستانی عدلیہ عالمی انصاف کی کوششوں کے ساتھ کھڑی ہے ۔چیف جسٹس نے کہا کہ عدالتی اصلاحات اور محروم طبقے کی آواز بننا ہماری اولین ترجیح ہے ۔دریں اثنا چیف جسٹس یحیی آفریدی سے سپریم کورٹ بارکے صدر میاں رؤف عطا نے ملاقات کی اور انہیں بلوچستان کے قانونی برادری کو درپیش مسائل سے بھی مختصراً آگاہ کیا ،چیف جسٹس نے مسائل حل کرنے کی یقین دہانی کرائی۔
