توشہ خانہ ٹو کیس ،استغاثہ کے ایک اور گواہ پر جرح مکمل
راولپنڈی (خبر نگار)بانی پی ٹی آئی عمران خان اور بشریٰ بی بی کیخلاف توشہ خانہ ٹو کیس کی اڈیالہ جیل میں سماعت کے دوران استغاثہ کے مزید ایک گواہ پر جرح مکمل کر لی گئی۔مقدمہ میں مجموعی طور پر 9 گواہان پر جرح مکمل جبکہ دسویں گواہ پر جزوی جرح کی جاسکی۔
عمران خان اور بشری ٰکو جیل سے کمرہ عدالت میں پیش کیا گیا ۔توشہ خانہ ٹو کیس کی سماعت سپیشل جج سینٹرل شاہ رخ ارجمند نے اڈیالہ جیل میں کی۔ سماعت کے دوران استغاثہ کے مزید ایک گواہ شفقت محمود پر جرح مکمل جبکہ گواہ محسن حسن پر بھی بانی کے وکیل نے جزوی جرح کر لی۔ مقدمہ کی سماعت ہفتہ 26 جولائی تک ملتوی کر دی گئی ،آئندہ سماعت پر بانی کے وکیل گواہ محسن حسن پر جرح کا عمل مکمل کریں گے ، ملزموں کی جانب سے وکیل صفائی قوسین فیصل مفتی جبکہ استغاثہ کی جانب سے سپیشل پبلک پراسیکیوٹرز ذوالفقار عباس نقوی، عمیر مجید ملک عدالت پیش ہوئے ۔
