ڈیگاری واقعہ:ویڈیو بیان پر والدہ مقتولہ گرفتار،جسمانی ریمانڈ
کوئٹہ(سٹاف رپورٹر)کوئٹہ کے نواحی علاقے ڈیگاری میں غیرت کے نام پر مرد و خاتون کے قتل کے کیس میں پولیس نے مقتولہ بانو بی بی کی والدہ گل جان کو ایک ویڈیو بیان جاری کرنے پر گرفتار کر لیا۔
گل جان نے ویڈیو بیان میں قتل کو بلوچی رسم و رواج کے مطابق سزا قرار دیا تھا اور اس کی حمایت کی تھی، پولیس کے مطابق گل جان کو انسداد دہشت گردی کی عدالت میں پیش کیا گیا جہاں عدالت نے ان کا دو روزہ جسمانی ریمانڈ منظور کر لیا ، گل جان پر الزام ہے کہ انہوں نے سوشل میڈیا پر جاری کردہ ویڈیو میں قتل کی حمایت کی اور گرفتار افراد کو بے گناہ قرار دیا ، پولیس کا کہنا ہے کہ یہ بیان دہرے قتل کی حمایت اور انصاف کے عمل پر اثرانداز ہونے کی کوشش کے مترادف ہے ۔ویڈیو بیان میں گل جان کا کہنا تھا کہ ان کی بیٹی بانو بی بی کو ایک لڑکے کے ساتھ تعلقات کی بنا پر بلوچ جرگے کے فیصلے کے تحت قتل کیا گیا،لڑکا ٹک ٹاک ویڈیوز بناتا تھا جس سے ان کے بیٹے مشتعل ہوتے تھے ، بانو پانچ بچوں کی ماں تھی، اور ان کے سب سے بڑے بیٹے کی عمر 16 سال ہے ۔ہمارے لوگوں نے کوئی ناجائز فیصلہ نہیں کیا، یہ فیصلہ بلوچ رسم و رواج کے تحت کیا گیا تھا۔ اس فیصلے میں سردار شیر باز ساتکزئی کا کوئی کردار نہیں تھا اور جرگہ ان کے بغیر ہوا تھا ،سردار شیر باز ساتکزئی سمیت گرفتار افراد کو رہا کیا جائے ۔
