غیرت کے نام پر قتل بڑی لعنت
اسلام آباد(مانیٹرنگ ڈیسک )وفاقی وزیر دفاع خواجہ آصف نے کہاہے کہ غیرت کے نام پر قتل سب سے بڑی بے غیرتی ہے ، جو معاشرہ اس سے چشم پوشی کرتا ہے وہ بھی غیرت سے عاری ہوتا ہے۔
خواجہ آصف نے غیرت کے نام پر قتل کو شدید الفاظ میں تنقید کا نشانہ بناتے ہوئے اسے ‘‘سب سے بڑی بے غیرتی’’ قرار دیا ہے ۔اپنے جاری بیان میں خواجہ آصف نے مزید کہا ہے کہ جو معاشرہ غیرت کے نام پر قتل جیسے سنگین جرم پر خاموشی اختیار کرتا ہے وہ بھی غیرت سے عاری ہوتا ہے ، ایسے واقعات کو کسی صورت برداشت نہیں کیا جانا چاہئے اور ریاستی اداروں کو چاہئے کہ وہ اس ظلم کے خلاف فوری اور مؤثر کارروائی کریں۔ انہوں نے کہا کہ غیرت کے نام پر قتل نہ صرف ایک فرد کا ناحق قتل ہے بلکہ یہ پورے معاشرے کی اخلاقی پستی کی علامت ہے ، قانون کی بالادستی اور انصاف کی فوری فراہمی ہی اس لعنت کو روکنے کا واحد راستہ ہے۔
