عوامی حقوق کی جنگ جاری رہے گی،حافظ نعیم
کراچی (سٹاف رپورٹر) جماعت اسلامی پاکستان کے امیر حافظ نعیم الرحمن نے کہا ہے کہ کراچی میں ایک سرکاری سکول بھی ایسا نہیں جو معیاری تعلیم دے رہا ہو، سندھ حکومت کا 631 ارب روپے کا تعلیمی بجٹ کا بڑا حصہ کرپشن اور نا اہلی کی نذر ہو جاتا ہے۔
تعلیم حکومت و ریاست کی ذمہ داری ہے جسے وہ پورا نہیں کر رہی ہے ، پاکستان میں 2کروڑ 62لاکھ اور سندھ میں 1کروڑ بچے اسکولوں سے باہر اور تعلیم سے محروم ہیں جو ایک اجتماعی المیہ ہے ، جماعت اسلامی ملک میں ایسا نظام ِ تعلیم لانا چاہتی ہے جس میں یکساں نصاب اور ایک معیار غریب و امیر کے لیے تعلیمی تفریق نہ ہو۔ ان خیالات کا اظہار انہوں نے ٹی ایم سی گلبرگ کے تحت فیڈرل بی ایریا بلاک 11میں بہادر یار جنگ اسکول کی تعمیر ِ نو و آرائش کے بعد افتتاح کے موقع پر تقریب سے خطاب کرتے ہوئے کیا۔انہوں نے مزید کہاکہ پیپلزپارٹی کی صوبائی حکومت تمام اختیارات اپنے پاس رکھنا چاہتی ہے ، ٹاؤنز و یوسیز کو ترقیاتی کاموں کے لیے فنڈز بھی نہیں دیے جارہے لیکن جماعت اسلامی صرف اختیارات کے حصول کے لیے ہی جدوجہد نہیں بلکہ عملاً عوام کی خدمت کر رہی ہے ،جماعت اسلامی اس شہر اور ملک کے عوام کے حقوق سے دست بردار نہیں ہوگی، حافظ نعیم الرحمن نے کہا کہ بلدیاتی انتخابات میں سب سے زیادہ ووٹ جماعت اسلامی نے حاصل کیے تھے مگر پیپلز پارٹی نے دھاندلی، چھینا جھپٹی اور طاقت کے ذریعے کراچی پر اپنا میئر مسلط کیا، عوامی مینڈیٹ پر ڈاکا مار کر جمہوریت کا گلا گھونٹا گیا۔
