خواتین کو ملکی باگ ڈور میں کردار ادا کرنا چاہئے :گورنر پنجاب
لاہور(سپیشل رپورٹر)گورنر پنجاب سردار سلیم حیدر خان نے کہا کہ تعلیم یافتہ خواتین کو معاشرے میں آگے آکر ملک کی باگ ڈور میں اپناکردار ادا کرنا چاہئے ،ملکی سیاست میں محترمہ فاطمہ جناح، بے نظیر بھٹو ایک مثال ہیں۔
پیپلزپارٹی نے اپنے دور اقتدار میں خواتین کیلئے سرکاری ملازمت میں کوٹہ رکھا اور روزگار کے مواقع فراہم کئے ،خواتین کی ہراسمنٹ کے خلاف حکومت زیرو ٹالرنس اختیار کئے ہوئے ہے ، ملک کی معاشی ترقی میں خواتین کابڑھ چڑھ کر حصہ لینا قابل تحسین ہے ۔ ان خیالات کا اظہار اُنہوں نے گزشتہ روز گورنر ہاؤس لاہور میں ویمن چیمبر آف کامرس اینڈ انڈسٹری گجرات کی صدر صائمہ سرفراز اور تاجر رہنما وقار ایوب بٹ کی زیر قیادت ملاقات کرنیوالے وفدسے گفتگو کرتے ہوئے کیا ،ملاقات میں ملکی معیشت اور کاروباری معاملات میں خواتین کے کردار پر تبادلہ خیال کیا گیا۔گورنر پنجاب نے مزید کہا کہ ملکی سیاست، تجارت اور زندگی کے ہر شعبے میں خواتین نے اپنا لوہا منوایا ۔ اُنہوں نے کہا کہ والدین بچیوں کو پڑھانے لکھانے اور اتنی ڈگریاں حاصل کرنے کے بعد گھروں میں نہ بٹھائیں بلکہ انہیں باہر نکل کر اپنی صلاحیتوں سے ملک کی ترقی میں کردار ادا کرنے کے مواقعے دیں،خواتین کاروباری وتجارتی سرگرمیوں میں عملی طور پر حصہ لیں تاکہ انہیں بااختیار بنایا جائے ،صدر پاکستان آصف علی زرداری کے حکم کے مطابق گورنر ہاؤس کے دروازے تاجر برادری کے مسائل حل کرنے کیلئے ہر وقت کھلے ہیں،خواتین کو معاشی طور پر بااختیار بنانے اور معاشرے میں باعزت مقام دلانے کیلئے بھرپور تعاون رہے گا۔
