افغان وزیر خارجہ کا دورہ پاکستان ملتوی ہوا نہ منسوخ: دفتر خارجہ
اسلام آباد (مانیٹرنگ ڈیسک ،وقائع نگار) پاکستان نے دوٹوک الفاظ میں واضح کیا ہے کہ پاکستان اسرائیل کو تسلیم نہیں کرتا، بانی پاکستان قائداعظم محمد علی جناح کی پالیسی پر عملدرآمد جاری ہے کہ پاکستانی شہری اپنے پاسپورٹ پر اسرائیل کا سفر نہیں کر سکتے ،بانی پاکستان محمد علی جناح نے اس معاملے پر واضح پالیسی دی تھی۔
جس پر آج بھی عملدرآمد جاری ہے ۔ ترجمان دفتر خارجہ نے افغان ناظم الامور کو سفیر کے مساوی پروٹوکول دینے کی بھی تصدیق کردی۔ ہفتہ وار پریس بریفنگ میں ترجمان دفتر خارجہ شفقت علی خان نے بتایا کہ پاکستان بیت المقدس میں اسرائیلی وزیروں کے اشتعال انگیز اقدامات اور فلسطین میں جاری ظلم کی سخت مذمت کرتا ہے جبکہ کشمیری عوام کے حقِ خودارادیت کی بھرپور حمایت کرتا ہے ۔ مقبوضہ کشمیر میں بھی بھارتی جارحیت کی شدید مذمت کرتا ہے ، پاکستان بین الاقوامی قوانین کے مطابق کشمیری عوام کے حقِ خودارادیت کا مطالبہ کرتا ہے ۔ترجمان نے مزید کہا کہ مقبوضہ کشمیر میں کتابوں کی ضبطی اور بک سٹورز پر چھاپے افسوسناک ہیں ،بھارت کشمیر کی تاریخ کو مسخ کرنے کی کوشش کر رہا ہے ۔افغانستان کے حوالے سے بات کرتے ہوئے ترجمان نے کہا کہ پاکستان اور افغانستان نے باہمی معاہدے کے تحت اپنے اپنے ناظم الامور کو سفیروں کے مساوی اپ گریڈ کیا ہے اور اس حوالے سے نئی سفارتی اسناد کی طلبی کو ضروری نہیں سمجھا گیا، کابل میں پاکستانی ناظم الامور بھی سفیر کے طور پر فرائض انجام دے رہے ہیں۔ ترجمان نے کہا کہ افغان عبوری حکومت وزیر خارجہ امیر خان متقی کا دورہ پاکستان ملتوی ہوا اور نہ ہی منسوخ، دورے کے حوالے سے تاریخوں کا تعین کیا جا رہا ہے ۔ ایرانی صدر کے دور ہ پاکستان کے دوران دونوں ممالک کے درمیان تجارتی اور سفارتی معاہدے طے پائے ، دونوں ممالک نے باہمی تجارت کا حجم 3 ارب ڈالرز سے 10ارب ڈالرز تک بڑھانے کے عزم کا اظہار کیا۔ بلوچستان میں غیر ملکی سپانسرڈ دراندازی کے حوالے سے سوال پر ترجمان نے کہا کہ اس کے انسداد کے لئے تمام ضروری اقدامات کیے جا رہے ہیں۔پاکستان نے روس یوکرین تناز ع میں پاکستانیوں کے مبینہ ملوث ہونے کے الزامات کو بے بنیاد قرار دیتے ہوئے سختی سے مسترد کر دیا ہے ۔ترجمان نے کہا ہے کہ ابھی تک یوکرینی انتظامیہ نے اس ضمن میں نہ تو پاکستان سے رابطہ کیا اور نہ ہی معتبر شواہد پیش کئے ہیں، پاکستان معاملے کو یوکرین کے ساتھ اٹھائے گا اور وضاحت طلب کرے گا ، ترجمان نے کہا کہ عمران خان کے بیٹوں کو ویز ا وزارت داخلہ دے گی۔
