سیاسی اختلافات سے ہٹ کر صوبوں کی مدد کریں:حافظ نعیم
لاہور(سیاسی نمائندہ)امیر جماعت اسلامی حافظ نعیم الرحمان نے وزیر اعظم شہباز شریف سے ٹیلیفونک رابطہ کرکے خیبر پختونخوا، کشمیر،شمالی علاقہ جات میں سیلاب سے جانی ومالی نقصان پر افسوس کا اظہار کیا اورامدادی سرگرمیوں میں بھرپور تعاون کا یقین دلایا۔
حافظ نعیم الرحمان نے وزیراعظم سے کہا وفاقی حکومت سیاسی اختلافات سے ہٹ کر صوبوں کی مدد کرے ، وفاقی اور صوبائی حکومتوں کو مشکل کی اس گھڑی میں مل کر اقدامات کرنے چاہئیں۔ جماعت اسلامی اور الخدمت پاکستان کے کارکنان امدادی سرگرمیوں میں حکومت کی معاونت کریں گے ،ہم دکھ اور مشکل کی اس گھڑی میں حکومت اور عوام کے ساتھ ہیں۔انہوں نے شہباز شریف کو بتایا کہ جماعت اسلامی کے کارکنان نے پہلے ہی امدادی کارروائیاں شروع کردی ہیں۔حکمران درست فیصلے کریں تو عوام یکجا ہوسکتے ہیں ۔ حالیہ پاک بھارت جنگ قومی اتحاد کی مثال ہے ۔شہباز شریف نے کہا کہ این ڈی ایم نے پانچ سو ٹن سے زائد امدادی سامان متاثرہ علاقوں کے لیے روانہ کردیا ہے ۔ وزیراعظم نے امدادی سرگرمیوں میں جماعت اسلامی کے کردار کی تحسین کی۔اس سے قبل امیر جماعت اسلامی نے وزیر اعلیٰ خیبر پختونخوا علی امین گنڈاپور کو فون کرکے بھی ہر ممکن تعاون کی یقین دہانی کرائی تھی۔ دریں اثنا مرکزی تربیت گاہ سے خطاب کرتے ہوئے حافظ نعیم نے کہا ملک بدامنی اور لوٹ مار کا شکار ہے ۔ سیاست یرغمال ہے اور اس کا مطلب جھوٹ اور دھوکا دہی سمجھا جاتا ہے ، سیاست گولی، گالی اور قوم کو تعصبات میں تقسیم کرنے کی شکل اختیار کرچکی ہے ۔ جماعت اسلامی سیاست کو دین کے طابع کرنا چاہتی ہے ، ہم انسانوں کو انسانوں کی غلامی سے نکال کر اللہ کی حاکمیت کا نظام لانا چاہتے ہیں۔
