کوئی کھلاڑی واپس گیا تو متبادل آجائیگا،،سری لنکن کرکٹ بورڈ کا دورہ پاکستان جاری رکھنے کا اعلان
مہمان ٹیم کی واپس جانے کی خواہش پر وزیر داخلہ محسن نقوی کی کھلاڑیوں سری لنکن ہائی کمشنرفریڈ سری ویراتنے اور ٹیم منیجر سے ملاقات ، سکیورٹی کی مکمل یقین دہانی تمام سری لنکن کرکٹر رکنے پر آمادہ ،ون ڈے سیریز کا شیڈول تبدیل ،میچز کل اور اتوار کوراولپنڈی میں ہی کھیلے جائینگے ،سہ ملکی سیریز کیلئے زمبابوے ٹیم بھی اسلام آباد پہنچ گئی
راولپنڈی (سپورٹس رپورٹر)پاکستان کرکٹ بورڈ کی یقین دہانی کے بعد سری لنکن کرکٹ ٹیم نے دورہ پاکستان جاری رکھنے کا فیصلہ کیا ہے ،گزشتہ روز سری لنکن کرکٹ ٹیم کے منیجرکا بیان سامنے آیا تھا کہ سری لنکن کرکٹ ٹیم کے کھلاڑی سکیورٹی خدشات کے باعث دورہ پاکستان ادھورا چھوڑ کر واپس جانا چاہتے ہیں تاہم چیئرمین کرکٹ بورڈ اور وزیرداخلہ محسن نقوی کی جانب سے سری لنکن ٹیم کی فول پروف سکیورٹی کی یقین دہانی پر سری لنکاکرکٹ بورڈ نے دورہ جاری رکھنے کا اعلان کرتے ہوئے کہاکہ اگر کوئی کھلاڑی دورہ جاری نہیں رکھنا چاہتا تو متبادل کا انتظام کیا جائے گا۔تٖفصیلات کے مطابق سری لنکا کی کرکٹ ٹیم نے سکیورٹی خدشات کے باعث دور ہ پاکستان ادھورا چھوڑ کر وطن واپسی کی درخواست کردی،وزیر داخلہ محسن نقوی نے فوری طور پر کھلاڑیوں سے ملاقات کرکے انہیں سکیورٹی کی مکمل یقین دہانی کرائی ۔ذرائع کے مطابق وزیر داخلہ محسن نقوی نے اسلام آباد میں سری لنکن ہائی کمشنرفریڈ سری ویراتنے اور ٹیم منیجر مہندا ہالنگوڈاسے ملاقات کی، وزیرداخلہ مہمان کھلاڑیوں سے بھی ملے اورانہیں سکیورٹی کے حوالے سے اطمینان دلایا ۔
وزارت داخلہ کے مطابق حکومتِ پاکستان غیر ملکی ٹیموں کی سکیورٹی کے حوالے سے بین الاقوامی معیار کی تمام سہولیات فراہم کر رہی ہے ۔ پی سی بی کی یقین دہانی کے بعد سری لنکن کرکٹ بورڈ نے کھلاڑیوں اور مینجمنٹ کو دورہ پاکستان جاری رکھنے کی ہدایت کر دی۔سری لنکن کرکٹ بورڈ کا کہنا ہے کہ اگر کوئی کھلاڑی دورہ جاری نہیں رکھنا چاہتا تو اس کی جگہ متبادل کھلاڑی بھیج دیا جائے گا،ٹیم اور عملے کی حفاظت ہماری اولین ترجیح ہے ۔سری لنکن کرکٹ بورڈ کے مطابق سری لنکن کھلاڑیوں کو چیئرمین پی سی بی محسن نقوی نے سکیورٹی انتظامات کی یقین دہانی کروائی ہے ۔ذرائع کا کہنا ہے کہ سری لنکن ٹیم کے تمام کھلاڑی پاکستان میں رکنے پر رضامند ہیں۔اس سے قبل چیئرمین پی سی بی محسن نقوی نے سری لنکا کے ہائی کمشنر فریڈ سری ویراتنے سے ملاقات میں کہا تھا کہ سری لنکن ٹیم کی فول پروف سکیورٹی کیلئے اقدامات کو یقینی بنایا گیا ہے ، ٹیم کے کھلاڑی ہمارے سٹیٹ گیسٹ ہیں۔ مہمان کھلاڑیوں کو محفوظ ماحول فراہم کرنا حکومت کی اولین ترجیح ہے ۔سری لنکن بورڈ کا کہنا ہے کہ وہ پاکستان کرکٹ بورڈ کے ساتھ مسلسل رابطے میں ہے اور امید ہے کہ ون ڈے سیریز کا بقیہ شیڈول بلا تعطل مکمل کیا جائے گا۔
وطن واپس جانے والے کھلاڑیوں یا عملے کے ارکان کے خلاف باضابطہ جائزہ لیا جائے گا،دورہ کسی صورت منسوخ یا متاثر نہیں ہوگا۔دورہ جاری رہنے کی تصدیق کے بعد پاکستان اور سری لنکا کے درمیان راولپنڈی میں جاری ون ڈے انٹرنیشنل سیریز کے بقیہ 2 میچز کا شیڈول تبدیل کر دیا گیا۔ آج 13 نومبر کو ہونیوالا دوسرا ایک روزہ میچ کل بروز جمعہ 14جبکہ 15 نومبر کو شیڈول تیسرا ایک روزہ میچ 16 نومبر بروز اتوار کھیلا جائے گا۔محسن نقوی نے کہا کہ سری لنکن ٹیم کے پاکستان ٹور جاری رکھنے کے فیصلے پر شکر گزار ہیں،سیریز کے اگلے دونوں میچز راولپنڈی کرکٹ سٹیڈیم میں ہی ہونگے ۔وفاقی وزیر اطلا عات عطا تارڑ نے سری لنکن کرکٹ ٹیم کے دورہ پاکستان جاری رکھنے کے اعلان کے بعد کہا کہ کرکٹ کے کھیل کیلئے ہمیشہ حمایت کرنے پر سری لنکن ٹیم کے مشکور ہیں۔پاکستان آمد پر سری لنکن کرکٹ ٹیم کا دل کی گہرائیوں سے شکریہ، سری لنکن کرکٹ ٹیم کی موجودگی ہمارے لئے باعث اعزاز ہے ۔وزیر داخلہ خواجہ آصف نے بھی پاکستان آمد اور شاندار کرکٹ کھیل پیش کرنے پر سری لنکن ٹیم کا شکریہ ادا کیا۔انہوں نے کہاکہ ہماری نیک تمنائیں سری لنکن ٹیم کے ساتھ ہیں۔دوسری جانب سوشل میڈیا پر فرینڈشپ ناٹ آؤٹ ہیش ٹیگ کے ساتھ پاکستان میں شائقین کرکٹ نے ٹور جاری رکھنے پر سری لنکن ٹیم سے اظہار تشکر کا سلسلہ شروع کردیا جوٹاپ ٹرینڈ بن گیاہے ۔ دریں اثناء زمبابوے کی کرکٹ ٹیم رات گئے سہ ملکی سیریز کیلئے اسلام آباد پہنچ گئی ۔
