لوگوں کا حکومت سے واجبات لینا کتنا مشکل، چکر لگاتے رہتے : اسلام آباد ہائیکورٹ
ایک دن تنخواہ کے بغیر گزارنا مشکل، یہ تو ساڑھے چار سال ہوگئے ، لوگوں کے کروڑوں روپے حکومت نے رکھے ہوئے ہیں حکومت والا سلوک مت کریں، حلف نامہ لے لیں اپیل منظور تو رقم واپس:جسٹس محسن اختر، ادائیگیوں و بحالی کیس میں ریمارکس
اسلام آباد(اپنے نامہ نگارسے )اسلام آباد ہائیکورٹ کے جسٹس محسن اختر کیانی نے ملازمت میں سابقہ ادائیگیوں سمیت بحالی سے متعلق کیس کی سماعت کے دوران اہم ریمارکس دیتے ہوئے کہاکہ لوگوں کا حکومت سے اپنے واجبات لینا کتنا مشکل کام ہے ،لوگ چکر لگاتے رہتے ہیں،لوگوں کے کروڑوں روپے حکومت نے رکھے ہوئے ہیں،ایک دن تنخواہ کے بغیر گزارنا مشکل ہے یہ تو ساڑھے چار سال ہوگئے، حکومت والا سلوک آپ مت کریں،یہ حکومت کا اور کورٹ کا معاملہ ہے پیسے حکومت دے رہی ہے ،ساڑھے چار سال سے درخواست گزار کی تنخواہ ادا نہیں کی، کب ادا کریں گے۔ پی بی سی کے اسسٹنٹ ڈائریکٹر ایڈمن نے عدالت کو بتایاکہ آج یا کل تک تنخواہ ادا کردی جائے گی۔ جسٹس محسن اختر کیانی نے استفسار کیاکہ باقی واجبات کب تک اداکردیں گے ؟ اسسٹنٹ ڈائریکٹر ایڈمن نے کہا ہائیکورٹ کے فیصلے کے خلاف سپریم کورٹ میں اپیل دائر کر رہے ہیں۔ جسٹس محسن اختر کیانی نے کہاان سے حلف نامہ لے لیں اگر اپیل منظور ہوگئی تو تمام پیسے واپس کریں گے ،بعدازاں سماعت ملتوی کر دی گئی۔
