آج بھی کہتا ہوں عمران کیلئے سہولت کاری موجود ، جاوید لطیف
سہولت کاری کی کھڑکی اب بھی کھلی ہے جو کل کو ایک دروازہ بھی بن سکتا عمران خان، فیض حمید پراجیکٹ میں کون کون لوگ تھے سامنے لایا جائے ، انٹرویو
لاہور(آئی این پی )مسلم لیگ ن کے رہنما جاوید لطیف نے کہاہے کہ اداروں میں کچھ لوگ ہیں جو عمران خان کو اقتدار میں لانا چاہتے ہیں ، آج بھی کہتا ہوں کہ عمران خان کے لیے سہولت کاری موجود ہے ۔ایک انٹرویو میں جاوید لطیف نے کہا کہ سہولت کاری کی کھڑکی اب بھی کھلی ہے جو کل کو ایک دروازہ بھی بن سکتا ہے ۔انہوں نے کہا کہ فیض حمید نے جن سے فیصلے لئے وہ آج کئی بڑے نام بن چکے یا بااختیار ہوچکے ، ان کے ساتھ دیگر لوگوں کو بھی کٹہرے میں کھڑا کرنا چاہیے ۔ ن لیگی رہنما نے کہا کہ نواز شریف نے گوجرانوالہ میں جن پانچ لوگوں کا نام لیا تھا وہ اس وقت طاقت میں تھے ، عمران خان، فیض حمید پراجیکٹ میں کون کون لوگ تھے ان کو سامنے لایا جائے ۔انہوں نے کہا کہ فیصلے میں لکھا ہے کہ فیض حمید کے خلاف اور بھی چیزوں کی تفتیش ہونی ہیں، یہ بھی ایک حقیقت ہے کہ فیض حمید اکیلے یہ کام نہیں کرسکتے تھے ۔ جاوید لطیف نے کہا کہ اللہ اللہ کرکے احتساب شروع ہوگیا تو اسے پایہ تکمیل تک پہنچایا جائے ۔
