پی ٹی آئی مذاکرات پر حقیقت پسندی سے کام لے ، مراد علی شاہ
ایک شخص کے پیچھے سیاست مت کریں، لوگوں نے احتجاج کے لئے ووٹ نہیں دیا برطانیہ میں پاکستانی قونصلیٹ کے سامنے مظاہرے میں دھمکیاں دینا قابل مذمت
سکھر (مانیٹرنگ ڈیسک، خبر ایجنسی) وزیراعلیٰ سندھ سید مراد علی شاہ نے پی ٹی آئی کو مذاکرات پر حقیقت پسندی سے کام لینے کا مشورہ دے دیا۔سکھر میں میڈیا سے گفتگو کرتے ہوئے مراد علی شاہ نے کہا کہ مذاکرات پر پی ٹی آئی کی سیاست ہمیشہ تضادات کا شکار رہی ہے ، پی ٹی آئی کا ہمیشہ سے وتیرہ رہا ہے کہ وہ اپنی بات پر قائم نہیں رہتی۔انہوں نے مزید کہا کہ تحریک انصاف کو کہیں گے کہ ایک شخص کے پیچھے سیاست مت کریں ، لوگوں نے انہیں احتجاج کے لیے ووٹ نہیں دیا۔ وزیر اعلیٰ سندھ کا برطانیہ میں پاکستانی قونصلیٹ کے سامنے احتجاجی مظاہرے میں دھمکیاں دینے والوں کی مذمت کرتے ہوئے کہنا تھا کہ ان کی کھوکھلی دھمکیوں میں نہیں آئیں گے ۔
