سفری وائوچرز کی تفصیل کیو ں مانگی گئیں ، ارکان اسمبلی ناراض
مطلوبہ تفصیل دینے کے بعد ہی آئندہ 6ماہ کے سفری واؤچرز جاری ہونگے ارکان کا غیر معمولی اقدام پر تحفظا ت کا اظہار،معاملہ سپیکر کے سامنے لانیکافیصلہ
اسلام آباد(مانیٹرنگ ڈیسک)قومی اسمبلی سیکرٹریٹ نے ارکانِ اسمبلی سے سفری واؤچرز کی تفصیلات طلب کر لیں، ارکان اسمبلی نے ناراضی کا اظہار کرتے ہوئے معاملہ سپیکر کے نوٹس میں لانے کا فیصلہ کر لیا۔ ذرائع کے مطابق ارکان نے اس غیر معمولی اقدام پر تحفظات ظاہر کرتے ہوئے معاملہ سپیکر قومی اسمبلی سردار ایاز صادق کے سامنے اٹھانے کا فیصلہ کیا ہے ۔ ذرائع کا کہنا ہے کہ اراکینِ قومی اسمبلی کو سالانہ بنیادوں پر دو اقساط میں تقریباً بارہ سے پندرہ لاکھ روپے مالیت کے سفری واؤچرز فراہم کیے جاتے ہیں جو وہ اپنے اور اہلِ خانہ کے فضائی سفر کے لیے استعمال کرتے ہیں۔اب قومی اسمبلی سیکرٹریٹ کی جانب سے یکم جولائی سے اکتیس دسمبر تک جاری کیے گئے سفری واؤچرز کے استعمال کی مکمل تفصیلات طلب کی گئی ہیں۔اس مقصد کے لیے اراکین کو ایک خصوصی پرفارما ارسال کیا گیا ہے جس میں یہ واضح کرنے کی ہدایت دی گئی ہے کہ سفری واؤچرز کہاں اور کس مقصد کے لیے استعمال کیے گئے ۔ذرائع کے مطابق ارکان کو بتایا گیا کہ مطلوبہ معلومات فراہم کرنے کے بعد ہی یکم جنوری سے تیس جون دوہزارچھبیس تک کے باقی ماندہ سفری واؤچرز جاری کیے جائیں گے ۔
