پاک فوج کے دور افتادہ علاقوں میں میڈیکل کیمپس، ہزاروں افراد مستفید
مستوج، شمالی وزیرستان ،آزاد کشمیر میں ڈاکٹرز نے مفت طبی معائنہ کر کے ادویات دیں پاک فوج کی عوامی خدمت، صحت مند معاشرے کے قیام کے عزم کا عملی مظہر ، علاقہ مکین
اسلام آباد (خصوصی نیوز رپورٹر)پاک فوج ملک کے پسماندہ اور دور دراز علاقوں میں عوامی خدمت کے مشن کو عملی جامہ پہناتے ہوئے صحت کے شعبے میں نمایاں خدمات انجام دے رہی ہے ۔ پاک فوج کے بھرپور تعاون سے مستوج، شمالی وزیرستان اور آزاد کشمیر میں فری میڈیکل کیمپس کا انعقاد کیا گیا، جہاں عوام کو مفت ،معیاری طبی سہولیات فراہم کی گئیں۔اسی طرح کریلا سیکٹر، کوٹلی، باغ اور دتہ خیل میں منعقدہ فری میڈیکل کیمپس میں بھی پاک فوج کے ماہر اور قابل ڈاکٹرز نے اپنی خدمات انجام دیں۔ ان میڈیکل کیمپس میں مستند ڈاکٹرز اور پیرا میڈیکل سٹاف نے مرد ، خواتین اور بچوں کا مفت طبی معائنہ کیا۔موسمِ سرما کی شدت کے باعث علاقوں میں پھیلنے والی موسمی بیماریوں کے تدارک کے لیے ڈاکٹرز اور پیرا میڈیکل سٹاف نے بھرپور پیشہ ورانہ خدمات سرانجام دیں۔ میڈیکل کیمپس میں مریضوں کو مفت ادویات بھی فراہم کی گئیں، جس سے بڑی تعداد میں علاقہ مکین مستفید ہوئے ۔پاک فوج کے زیرِ اہتمام قائم ان فری میڈیکل کیمپس سے ہزاروں افراد نے فائدہ اٹھایا ،علاقہ مکینوں کا کہنا تھا کہ یہ فری میڈیکل کیمپس پاک فوج کی عوامی خدمت، سماجی ذ مہ داری اور صحت مند معاشرے کے قیام کے عزم کا عملی مظہر ہیں جو ریاست اور عوام کے درمیان اعتماد اور مضبوط رشتے کو مزید مستحکم کرتے ہیں۔
