بدقسمتی سے چچا آصف زرداری کی پارٹی بھی ہائبرڈ ہو گئی،ایمل ولی
نواز شریف، ان کی پارٹی اور پارلیمان بھی شامل،ملک میں امن کا مطالبہ کرتے ہیں باچا، ولی خان کو سیاست میں کبھی فراموش نہیں کیا جا سکتا، برسی کے جلسے سے خطاب
کراچی (این این آئی)عوامی نیشنل پارٹی (اے این پی)کے سربراہ ایمل ولی خان نے کہا ہے کہ بدقسمتی سے سب کچھ ہائبرڈ ہو گیا، اس میں چچا آصف زرداری اور ان کی پارٹی بھی شامل ہے ۔باچا خان کی برسی کے جلسے سے خطاب میں ایمل ولی خان نے کہا کہ جو لوگ سمجھتے تھے اے این پی ختم ہو گئی وہ دیکھ لیں، باچا خان اور ولی خان کو سیاست میں کبھی فراموش نہیں کیا جا سکتا۔انہوں نے کہا کہ کراچی کے پختونوں نے ثابت کر دیا ہے کہ وہ اے این پی کے ساتھ ہیں، یہ کہنا درست نہیں کہ پختون قوم طالبان یا پی ٹی آئی کے ساتھ ہے ۔
اے این پی سربراہ نے مزید کہا کہ تیراہ کے لوگ بے یارو مددگار اپنے گھروں کو خالی کر رہے ہیں، لگتا ہے وفاقی حکومت کے لیے خیبر پختونخوا کوئی حیثیت نہیں رکھتا، انسانی حقوق کی تذلیل پر کوئی بات نہیں کر رہا۔ انہوں نے کہا تیراہ کے لوگوں کو ان کے مستقبل کی ذمہ داری دینا لازمی ہے ، دہشت گردوں کی سہولت کاری کی اجازت نہیں دی جا سکتی۔ ایمل ولی خان کا کہنا تھا کہ ہم پورے ملک میں امن کا مطالبہ کرتے ہیں، لاکھوں پختون کراچی، لاہور، بلوچستان میں رہتے ہیں، میں ان کا حق مانگوں گا۔انہوں نے کہا کہ پختون قوم کے لیے ایک پرامن پاکستان ضروری ہے ، دہشت گرد قوم اور ریاست کے دشمن ہیں، نواز شریف، ان کی پارٹی اور پارلیمان بھی ہائبرڈ ہو گئی ہے ۔
