بالائی علاقوں میں شدید برفباری، ہر سو سفیدی چھا گئی، رابطے منقطع
لاہور: (دنیا نیوز) بالائی علاقوں میں شدید برفباری ہوئی، ہر سو سفیدی چھا گئی، کیلاش میں نظارے مزید نکھر گئے۔
وادی نیلم میں ایک مرتبہ پھر ہلکی برف باری ہوئی، گریس ویلی میں پانچ فٹ تک برفباری ریکارڈ کی گئی، لوگ گھروں میں محصور ہوکر رہ گئے، بجلی کی بحالی کا کام جاری رہا، گریس ویلی تک جانے والی سڑک بند کر دی گئی، وادی لیپہ میں شدید برفباری کے باعث زمینی رابطہ منقطع ہرگیا۔
پاک فوج کا کامیاب ہیلی ریسکیو اینڈ ریلیف آپریشن جاری رہا، طبی پیچیدگی کی شکار مریضہ کو ہیلی ایمرجنسی سہولت سے راولپنڈی ملٹری ہسپتال منتقل کیا گیا۔
برفباری کے باعث پھنسے شہریوں کو ریسکیو کرنے کیلئے پاک فوج کی کارروائی بھی جاری رہی، کوٹلی نکیال سڑک کو ٹریفک کیلئے بحال کر دیا گیا، پیر نسورہ میں متعدد خاندانوں کو ریسکیو کرکے خوراک اور دیگر امدادی اشیا فراہم کی گئیں۔
واضح رہے کہ ملک بھر میں آج سے مزید بارشوں اور برفباری کی پیش گوئی کردی گئی ہے، خیبرپختونخوا، بلوچستان،گلگت بلتستان میں بارش اور برف باری کا امکان ہے، اسلام آباد، مری، گلیات میں بھی بارش اور برفباری متوقع ہے۔
بتایا گیا ہے کہ پنجاب کے مختلف علاقوں میں بھی بادل برسیں گے، بالائی علاقوں میں پارا مزید گر گیا، لہہ میں درجہ حرارت منفی 14، استور، کالام نتھیا گلی میں منفی 9 ریکارڈ کیا گیا، پارا چنار، قلات میں منفی 8، گوپس میں پارا منفی 7 سینٹی گریڈ کیا گیا۔
