ورلڈسنوکر چیمپئن شپ جیتنے والے محمد آصف کی وطن واپسی
کراچی (سپورٹس ڈیسک )ورلڈسنوکر چیمپئن شپ جیتنے والے محمد آصف وطن واپس پہنچ گئے لیکن کراچی ایئرپورٹ پر کوئی کوئی حکومتی نمائندہ ان کے استقبال کیلئے نہ آیا،پاکستان بلیئرڈز اینڈ سنوکر ایسوسی ایشن کے عہدیداروں نے ان کا استقبال کیا ۔۔۔
ائیرپورٹ پر گفتگو میں محمد آصف نے کہا کہ ٹورنامنٹ کے آغاز میں کچھ مشکلات کا سامنا کرنا پڑا، لیکن بعد میں فارم میں آنے کے بعد کامیابی ملی۔ پی بی ایس اے نے انہیں بھرپور سپورٹ فراہم کی، چیئرمین عالمگیر شیخ نے روانگی سے پہلے تیسری بار ٹائٹل جیتنے کی خواہش ظاہر کی تھی۔انہوں نے بتایا کہ قطر کے احمد سیف کے خلاف میچ مشکل تھا، اس میچ کو جیتنے کے بعد راہیں ہموار ہوئیں۔ائیرپورٹ پر حکومتی نمائندے کی غیر موجودگی پر انہوں نے کہاکہ یہ افسوس کی بات ہے کہ ایک ورلڈ چیمپئن کے استقبال کیلئے کوئی نہیں آیا۔ اگر چیمپئنز کے ساتھ یہ رویہ ہوگا تو نوجوان کھلاڑی کیسے حوصلہ پائیں گے ۔محمد آصف نے حکومت سے مطالبہ کیا کہ چیمپئن پلیئرز کی مناسب حوصلہ افزائی کرے اور ان کے انعامات پر نظرثانی کرے ۔
