قائداعظم ٹرافی :سیالکوٹ نے پشاور کو اننگز اور 57رنز سے ہرادیا
ا یبٹ آباد (سپورٹس ڈیسک )اذان اویس کی ناقابل شکست ڈبل سنچری اور لیفٹ آرم فاسٹ بولر شعیب اختر کی چھ وکٹوں کی عمدہ کارکردگی نے سیالکوٹ کو پشاور کے خلاف قائداعظم ٹرافی کے سہ فریقی مرحلے کے پہلے میچ میں اننگز اور 57 رنز سے کامیابی دلادی۔
میچ کا فیصلہ تیسرے دن ہی ہوگیا جب پشاور کی ٹیم اپنی دوسری اننگز میں 182 رنز بناکر آؤٹ ہوگئی۔ اس سے قبل سیالکوٹ نے 319 رنز 6 کھلاڑی آؤٹ پر اپنی اننگز دوبارہ شروع کی تو اذان اویس 161 رنز پر ناٹ آؤٹ تھے ۔ انہوں نے اپنے فرسٹ کلاس کریئر کی پہلی ڈبل سنچری 407گیندوں پر 27چوکوں کی مدد سے مکمل کی۔وہ 203 رنز بناکر ناٹ آؤٹ رہے اورانہوں نے بیٹ کیری کیا۔ پشاور کی ٹیم دوسری اننگز میں شعیب اختر اور محمد علی کی بولنگ کے سامنے بے بس نظر آئی۔ ایک موقع پر 95 رنز پر آدھی ٹیم آؤٹ ہوچکی تھی۔سجاد ابراہیم 44 رنز بناکر ٹاپ سکورر رہے ۔ شعیب اختر نے 51 رنز کے عوض 6 وکٹیں حاصل کیں جو ان کی کریئر بیسٹ بولنگ ہے ۔ قائداعظم ٹرافی کے سہ فریقی مرحلے کا دوسرا میچ 2 دسمبر سے ایبٹ آباد میں پشاور اور لاہور وائٹس کے درمیان کھیلا جائے گا ۔
