زمبابوے کیخلاف ٹی 20سیریز میں نئے پاکستانی چہروں کی نمائش
بلاوائیو(اسپورٹس ڈیسک )پاکستان ٹی20 ٹیم کے کپتان سلمان علی آغانے کہا ہے کہ زمبابوے کیخلاف ٹی 20 سیریز میں پاکستان کے نئے چہروں کی نمائش کی جائے گی ،ہدف ون ڈے کی طرح یہ سیریز بھی جتنا ہے ۔
بلاوائیو میں میڈیا سے گفتگو کے دوران سلمان علی آغا نے کہا کہ سب سے پہلی ترجیح تو سیریز جیتنا ہے ، ہم اپنی بینچ سٹرینتھ کو دیکھنا چاہتے ہیں۔ اس سیریز میں ہمیں اپنے نوجوان کھلاڑیوں کو زیادہ سے زیادہ موقع دینا ہے ، ہم نے ون ڈے سیریز جیتی اب بھی ہدف ٹی20 سیریز جیتنا ہے ۔ٹی20 ٹیم کے کپتان نے کہا کہ ٹی ٹونٹی سیریز میں نئے چہرے نظر آئیں گے ، یہ بھی وائٹ بال سیریز ہے ہمیں کچھ ایڈجسٹ ہونا پڑتا ہے ۔ان کا کہنا تھا کہ ٹی ٹونٹی سیریز میں اپنا مومینٹم برقرار رکھیں گے ، اسکواڈ میں ہمارے پاس اچھے سپنر ہیں، ہم جارحانہ انداز میں کھیلنے کی کوشش کریں گے ۔سلمان علی آغا نے یہ بھی کہا کہ نوجوان کرکٹرز ڈومیسٹک میں اچھا پرفارم کر کے آئے ہیں انہیں موقع دینا بنتا ہے ، ہم پر کوئی دباؤنہیں، چاہتے ہیں نوجوان کھیلیں اور انجوائے کریں۔انہوں نے کہا کہ زمبابوے کی ٹیم اپنی کنڈیشنز میں اچھی ہے وہ خطرناک ثابت ہوتی ہے ، میزبان ٹیم کے پاس میچ ونر ہیں ہم ان پر قابو پانے کی کوشش کریں گے ۔
