چیئر مین پی سی بی کی سعودی کھلاڑیوں کو تربیت دینے کی پیشکش
ریاض (سپورٹس ڈیسک)چیئر مین پاکستان کرکٹ بورڈ محسن نقوی نے ریاض میں سعودی عربیہ کرکٹ فیڈریشن کے چیئر مین شہزادہ سعود بن مشعل السعود سے ملاقات کی۔۔
جس میں سعودی عرب میں کرکٹ کے فروغ اور کھلاڑیوں کی ڈویلپمنٹ پر تبادلہ خیال کیا گیا۔چیئر مین پی سی بی محسن نقوی نے چیئرمین سعودی عربیہ کرکٹ فیڈریشن کو چیمپئنز ٹرافی ٹورنامنٹ کے میچز دیکھنے کے لئے پاکستان کے دورے کی دعوت دی۔ محسن نقوی نے کرکٹ کے فروغ اور سٹیڈیمز کی تعمیر کے حوالے سے ہر ممکن تعاون کی پیشکش کی ۔چیئر مین پی سی بی نے سعودی عرب کے کھلاڑیوں کو تربیت دینے کی پیشکش کی۔ محسن نقوی نے کہا کہ کرکٹ ڈویلپمنٹ کے لئے پلیئرز ایکسچینج پروگرام شروع کیا جا سکتا ہے ۔ سعودی عرب اپنے ابھرتے ہوئے کھلاڑیوں کو پاکستان بھجوا سکتا ہے اور کرکٹ ڈویلپمنٹ اور سٹیڈیمز کی تعمیر کے حوالے سے پوری معاونت کریں گے ۔سعودی عرب ہر پاکستانی کا دوسرا گھر ہے ،تعاون پر خوشی ہو گی۔ چیئرمین سعودی عربیہ کرکٹ فیڈریشن نے کہا کہ ہم پلیئرز ڈویلپمنٹ پر کام کر رہے ہیں۔سعودی عرب میں کرکٹ کے تقریباً 18ہزار کھلاڑی ہیں۔سعودی عرب نے ایشین کرکٹ کونسل کا چیلنج کپ بھی جیتا ہے ۔پاکستان کے ساتھ کرکٹ کے فروغ کیلئے قریبی تعاون کے ساتھ کام کرنا چاہتے ہیں۔
