قائداعظم گیمز ، فٹبال کا فائنل سندھ نے جیت لیا
اسلام آباد(سپورٹس رپورٹر) پاکستان سپورٹس بورڈ کے زیر اہتمام جاری قائداعظم بین الصوبائی گیمز میں فٹبال کا فائنل سندھ نے جیت لیا، خیبرپختونخوا نے دوسری جبکہ پنجاب نے تیسری پوزیشن حاصل کی۔
فٹبال کا فائنل میچ سندھ اور خیبر پختونخوا کی ٹیموں کے مابین کھیلا گیا۔ سنسنی خیز مقابلے میں اضافی وقت میں سندھ کی ٹیم نے فیصلہ کن گول کرتے ہوئے خیبر پختونخوا کو شکست دے دی۔فائنل میچ میں شائقین کی بڑی تعداد موجود تھی، جنہوں نے کانٹے کے مقابلے سے بھرپور لطف اٹھایا۔ وزارت بین الصوبائی رابطہ کے حکام، ڈی جی پاکستان سپورٹس بورڈ یاسر پیرزادہ اور دیگر معززین نے بھی یہ میچ دیکھا۔ شائقین نے سندھ فٹبال ٹیم کی عمدہ کارکردگی پر دل کھول کر داد دی۔ یہ میچ نہ صرف نوجوان کھلاڑیوں کے جوش و خروش کا مظہر تھا بلکہ بین الصوبائی کھیلوں کے فروغ کے لیے ایک اہم سنگ میل بھی ثابت ہوا۔
