پاک جنوبی افریقہ پہلا ٹیسٹ آج سے شروع ، عباس کی واپسی
سنچورین (سپورٹس ڈیسک )پاکستان اور جنوبی افریقہ کے درمیان دو ٹیسٹ میچوں کی سیریز کاپہلامیچ آج سے شروع ہوگا ، سنچورین میں کھیلا جانے والا ٹیسٹ باکسنگ ڈے ٹیسٹ دوپہر ایک بجے شروع ہوگا، آج میچ کیلئے ٹیم کااعلان کردیاگیا ہے ۔۔
ٹیم چار فاسٹ بولرز کے ساتھ میدان میں اترے گا۔ تجربہ کار فاسٹ بولر محمد عباس اورخرم شہزاد کی واپسی ہوئی ہے ۔ ٹیم کپتان شان مسعود، صائم ایوب، بابراعظم، کامران غلام، محمد رضوان، سعود شکیل، سلمان آغا، عامر جمال، نسیم شاہ، خرم شہزاد اور محمد عباس پرمشتمل ہوگی ۔ ٹیسٹ کپتان شان مسعود نے کہاہے کہ ہم جنوبی افریقہ کے خلاف خود کو جانچنے کے لیے بے تابی سے منتظر ہیں جو ہمیشہ سے دنیا کی سرفہرست ٹیموں میں سے ایک رہی ہے ۔ ہمیں انگلینڈ کے خلاف ہوم ٹیسٹ سیریز اور حالیہ ون ڈے سیریز سے کچھ مومینٹم ملا ہے جس میں ہمارے ٹیسٹ سکواڈ کے متعدد اراکین شامل تھے ۔تیز بولرز خرم شہزاد اور محمد عباس کی واپسی خوش آئند ہے ،ہم جنوبی افریقہ میں بڑی کامیابیوں کیلئے پرعزم ہیں جو حریف ٹیموں کے لیے چند انتہائی سخت کنڈیشنز میں سے ایک سمجھی جاتی ہے ،ہم جانتے ہیں کہ جنوبی افریقہ نے آئی سی سی ورلڈ ٹیسٹ چیمپئن شپ میں اچھی کارکردگی کا مظاہرہ کیا ہے لیکن ہم نے کم از کم دو ہفتے قبل یہاں پہنچنے کے بعد اس سیریز کے لیے بہترین انداز میں تیاری کی ہے ۔واضح رہے کہ آئی سی سی ورلڈ ٹیسٹ چیمپئن شپ ٹیبل پر جنوبی افریقہ پہلے اور پاکستان ساتویں نمبر پر ہے جبکہ پاکستان اور جنوبی افریقہ 1995 سے اب تک بارہ ٹیسٹ سیریز کھیل چکے ہیں جن میں سے سات میں جنوبی افریقہ نے کامیابی حاصل کی اوردو میں پاکستان فتح یاب ہوا ہے جبکہ تین سیریز ڈرا ہوئی ہیں۔
