2025 میں قومی ٹیم کا کس کس سے مقابلہ،شیڈول جاری
لاہور(سپورٹس ڈیسک)2025 بھی پاکستان کرکٹ ٹیم کے لیے ایکشن سے بھرپور ہونے والا ہے ۔2025 میں پاکستانی ٹیم اپنا پہلا ٹیسٹ میچ جنوبی افریقہ کے خلاف 3 جنوری سے کیپ ٹاؤن میں کھیلے گی۔
اس کے علاوہ 16 جنوری سے ملتان میں پاکستان اور ویسٹ انڈیز کے درمیان دو ٹیسٹ میچوں پر مشتمل سیریز کا پہلا میچ کھیلا جائے گا۔پاکستان اور ویسٹ انڈیز کے درمیان اس ٹیسٹ سیریز کا دوسرا میچ 24 جنوری سے ملتان ہی میں کھیلا جائے گا جو پاکستان کا ورلڈ ٹیسٹ چیمپئن شپ میں آخری ٹیسٹ ہوگا۔اس سیریز کے بعد ملتان ہی میں پاکستان، جنوبی افریقہ اور نیوزی لینڈ کے درمیان 8، 10، 12 اور 14 فروری کو تین ملکی ون ڈے سیریز کھیلی جائے گی۔تین ملکی سیریز کے بعد 19 فروری سے پاکستان کے تین شہروں لاہور، کراچی اور راولپنڈی سمیت یو اے ای کے شہر دبئی میں چیمپئنز ٹرافی ٹورنامنٹ کھیلا جائے گا۔چیمپئنز ٹرافی کا پہلا میچ 19 فروری کو کراچی میں میزبان پاکستان اور نیوزی لینڈ کے درمیان ہوگا۔چیمپئنز ٹرافی کے بعد پاکستانی ٹیم نیوزی لینڈ کا دورہ کرے گی۔پاکستان اور نیوزی لینڈ کے درمیان 16 مارچ سے 5 اپریل تک پانچ ٹی20 اور تین ون ڈے میچز کھیلے جائیں گے ۔
