آئی سی سی ایلیٹ پینل آف امپائرز میں مزید دو امپائرز شامل
لاہور(سپورٹس ڈیسک )آئی سی سی نے ایلیٹ پینل آف امپائرز میں مزید دو امپائرز کو شامل کرلیا۔جنوبی افریقہ کے علائالدینپالیکر اور انگلینڈ کے ایلیکس وہارف کو مائیکل گف اور جوئیل ولسن کی جگہ ایلیٹ پینل میں شامل کیا گیا ہے۔۔
یہ تقرریاں امپائرنگ کے معیار کو مزید بہتر بنانے اور بین الاقوامی کرکٹ میں بہترین امپائرز کو مواقع فراہم کرنے کے لیے کی گئی ہیں ،علائالدین پالیکر جنوبی افریقا کے سابق فرسٹ کلاس کرکٹر ہیں جو اب تک 4 ٹیسٹ، 23 ون ڈے اور 67 ٹی ٹونٹی میچز میں امپائرنگ کے فرائض انجام دے چکے ہیں۔ اس کے علاوہ وہ 17 خواتین کے بین الاقوامی میچز میں بھی خدمات انجام دے چکے ہیں اور حالیہ ٹی 20 ورلڈ کپ 2024 اور انڈر 19 ورلڈ کپ 2024 میں بھی امپائرنگ کر چکے ہیں۔ ایلیکس وہارف نے انگلینڈ کی جانب سے 13 ون ڈے انٹرنیشنل میچز کھیلنے کے بعد امپائرنگ میں قدم رکھا۔ وہ اب تک 7 ٹیسٹ، 33 ون ڈے اور 45 ٹی ٹونٹی انٹرنیشنل میچز میں امپائرنگ کر چکے ہیں۔ وہ 2024 کے مردوں اور خواتین کے ورلڈ کپ، ٹی 20 ورلڈ کپ اور 2025 کی چیمپئنز ٹرافی جیسے بڑے ایونٹس میں بھی شامل رہے ہیں۔ آئی سی سی چیئرمین جے شاہ نے پالیکر اور وہارف کو مبارکباد دیتے ہوئے کہا کہ ایلیٹ پینل کا حصہ بننا ایک اعزاز کے ساتھ ساتھ بڑی ذمے داری بھی ہے۔
، ہمیں یقین ہے کہ یہ دونوں امپائرز اپنی صلاحیتوں کا بھرپور مظاہرہ کریں گے ۔ علائالدین پالیکر نے اپنی تقرری پر خوشی کا اظہار کرتے ہوئے کہا کہ یہ ان کے کیریئر کا ایک بڑا لمحہ ہے جس پر وہ فخر محسوس کرتے ہیں۔ انہوں نے اپنی کامیابی کا سہرا اپنے والد، اساتذہ، دوستوں اور ساتھیوں کو دیا جنہوں نے ہمیشہ ان کا ساتھ دیا۔
