بھارت بزدل نکلا، کرکٹ میدان پر حملہ کیا:رمیز راجہ
راولپنڈی(سپورٹس رپورٹر)پاکستان کرکٹ بورڈ کے سابق چیئرمین رمیز راجہ نے کہا کہ بھارت نے بزدلانہ کارووائی کرتے ہوے کرکٹ کے میدان پر حملہ کیا، کرکٹ دنیا میں پاکستان کی پہچان ہے ۔۔
تمام سٹیک ہولڈرز کو اب کرکٹ کو اوپر کی طرف لیکر جانا ہوگا۔ راولپنڈی کرکٹ سٹیڈیم میں تقریب سے خطاب کرتے ہوے رمیز راجہ نے کہا کہ پاکستان چار دن کے اندر قوم بن کر ابھری ہے ، قوم میں اعتماد دیکھ کر خوش ہوا ہوں، ہر مشکل کے بعد ہیرو بننے کا موقع ہوتا ہے جو پاکستان نے کر کے دکھایا۔ انہوں نے کہا کہ کرکٹ میں پریشر ہوتاہے ، گریٹ کھلاڑی پریشر صورتحال سے گزر کر بنتے ہیں، پاکستانی قوم بھی مشکلات کا شکار تھی لیکن ہیرو بن کر ابھری جبکہ بھارت نے لحاظ نہیں کیا اور کرکٹ کے میدان پر حملہ کردیا- کوئی بھی خاندانی قوم پانی اور کرکٹ پر حملہ نہیں کرتی۔ رمیز راجہ نے کہا کہ مجھے افسوس ہوتاہے کہ پاکستان کئی شعبوں میں اوپر کیوں نہیں گیا،پاکستان میں ہر فرد کرکٹ کا سٹیک ہولڈر ہے ، کرکٹ ہے تو ہماری عزت ہے ہم سب نے پاکستان کرکٹ کو اوپر لیکر جاناہے ۔
