ٹی 20ورلڈ کپ ،پاکستان کی شرکت کا فیصلہ آج ہوگا
چیئرمین پی سی بی کی وزیر اعظم اور وزیرخارجہ سے ملاقاتیں متوقع ہیں سیاست زدہ کرکٹ کسی کے مفاد میں نہیں، اصولوں پر چلنا چاہیے :محسن نقوی
لاہور(سپورٹس ڈیسـک)کیا پاکستان ٹی 20 ورلڈ کپ 2026ء سے
بنگلادیش کو باہر کیے جانے کے بعد میگا ایونٹ کھیلے گا؟، وزیرِ اعظم شہباز شریف سے چیئرمین پی سی بی محسن نقوی کی آج ملاقات متوقع ہے ، جس میں ٹی 20 ورلڈ کپ میں شریک ہونے یا نہ ہونے سے متعلق فیصلہ کیا جائے گا ۔ پی سی بی نے میگا کرکٹ ایونٹ میں شرکت کرنے یا نہ کرنے سے متعلق وزیرِ خارجہ اسحاق ڈار سے بھی مشاورت کا فیصلہ کیا ہے ۔اس سے متعلق وفاقی وزیرِ اطلاعات عطاء تارڑ نے کہا ہے کہ مشاورتی عمل جاری ہے ، جو بھی فیصلہ ہو گا، اُس سے آگاہ کر دیا جائے گا۔
اس سے قبل محسن نقوی نے قومی ٹیم کے کھلاڑیوں سے ملاقات کی اور آئی سی سی کے فیصلے سے پیدا ہونے والی صورتِ حال پر انہیں اعتماد میں لیا۔کھلاڑیوں نے چیئرمین پی سی بی کے اصولی مؤقف کو سراہا اور مکمل حمایت کی۔ محسن نقوی نے کھلاڑیوں کو بتایا کہ آئی سی سی کے دہرے معیار کو پی سی بی مسترد کرتا ہے ۔انہوں نے کہا کہ بنگلا دیش کا ورلڈ کپ بھارت نہ کھیلنے کا فیصلہ اصولوں پر مبنی ہے ، ہم نے کرکٹ کے سنہری اصولوں کو مدِنظر رکھ کر بنگلا دیش کی حمایت کی۔چیئرمین پی سی بی نے کہا کہ پاکستانی حکومت جو فیصلہ کرے گی اس پر من و عن عمل کریں گے ، سیاست زدہ کرکٹ کسی کے مفاد میں نہیں، سب کو اصولوں پر چلنا چاہیے ۔
