ایسا ہوائی بجلی گھر جس کو آپ ساتھ لے کر گھوم سکتے ہیں
ریگستان ہو یا ساحلِ سمندر اب ہر جگہ ہوا سے بجلی تیار کرنے والا وِنڈ ٹربائن بنالیا گیا ہے جسے صرف 15 منٹ میں لگایا جاسکتا ہے اور یہ 200 سے 600 واٹ بجلی تیار کرسکتا ہے
ڈنمارک(نیٹ نیوز)ڈنمارک کے ایک انجینئرنے کائٹ ایکس نامی کمپنی بنائی ہے ۔ وہ اس سے پہلے موبائل فون چارج کرنے والی ہوائی پنکھڑیاں بناچکے ہیں اور بجلی بنانے والی پتنگ بھی انہی کی ایجاد ہے ۔اس ہلکی پھلکی ونڈ ٹربائن میں گلاس فائبر سلاخیں ہیں اور اس کی پنکھڑیاں ری سائیکل پلاسٹک اور ای پی ایس فوم سے بنی ہیں۔ پھر نائلون کی پٹیوں سے باندھ کر اسے ایستادہ کیا جاسکتا ہے ۔ پنکھڑیوں کا قطر چار میٹر ہے اور مجموعی طور پر اس کی اونچائی چھ میٹر ہے ۔ اس سے براہِ راست بجلی کے حصول کے ساتھ ساتھ تھرڈ پارٹی بیٹری میں بھی بجلی جمع کی جاسکتی ہے ۔اس ونڈ ٹربائن کو کسی بھی جگہ باآسانی لگایا جاسکتا ہے ، خواہ وہ پکنک کا خیمہ ہو یا پھر آپ کا اپنا گھر ہو۔
