بیٹے کو روکنے کیلئے طیارے میں بم کی جھوٹی اطلاع دیدی
ڈھاکا(نیٹ نیوز)بنگلہ دیش میں ایک ماں نے جہاز میں سوار بیٹے کو گرل فرینڈ کے ساتھ نیپال جانے سے روکنے کے لیے طیارے میں بم کی جھوٹی اطلاع دے دی۔
جمعے کے روز بنگلادیشی ائیرٹریفک حکام کو فون پر اطلاع دی گئی کہ ڈھاکا سے نیپال جانے والی بنگلہ دیش کی سرکاری ائیرلائن بیمان میں بم ہے ۔ جس پر تین گھٹنے تک جہاز کی تلاشی لی گئی تاہم کچھ نہ ملا اور پرواز کو کلیئرنس ملی تو جہاز مسافروں کو لے کر نیپال کے دارالحکومت کھٹمنڈو پہنچ گیا۔ بنگلہ دیشی میڈیا کے مطابق قانون نافذکرنے والے اداروں نے کالر کی شناخت کا عمل شروع کیا اور تحقیقات کے بعد معلوم ہوا کہ ماں نے اپنے شادی شدہ بیٹے کو گرل فرینڈ کے ساتھ نیپال جانے سے روکنے کے لیے طیارے میں بم کی جھوٹی اطلاع دی تھی۔پولیس نے مسافر کی والدہ، اہلیہ اور دوست کو گرفتار کرلیا ۔
روزنامہ دنیا ایپ انسٹال کریں
